Magsilbing FOI receiving officers wala pa makompleto

CEBU, Philippines — Dul-an na sa usa ka tuig human napirmahan ang Freedom of Information (FOI) ordinance sa Dakbayan sa Sugbo ang wala gihapon makompleto ang magsilbing FOI receiving officers sa tanang 27 ka departamento sa Cebu City Hall.

Atol sa Cebu Citizens Press Council 2023 World Press Freedom Day Forum kagahapon gibutyag ni Konsehal Rey Gealon nga sugod karong adlawa mohimo siya og lapad nga follow-up aron makompleto na ang FOI receiving officers sa tanang departamento.

Isip kanhi sakop sa media gihatagan og gibug-aton ni Gealon ang ka-importante sa trabaho sa mga tigbalita alang sa pagkuha sa gikanahanglan nga dokumento nga maoy  basehan sa report niini.

Apan matud ni Gealon nga wala siya’y kalibutan sa rason sa pagkalangay sa pagbutang og receiving officers sa matag departamento.

Si Gealon nagkanayon nga andam usab siya nga moduso og amendment sa maong ordinansa ilabi na sa exemptions sa higayon nga mahuman na ang mga konsultasyon nga iyahang buhaton sa pipila ka stakeholders ilabi na sa mga media.

Nasayran nga gipirmahan ni Mayor Michael Rama niadtong Hulyo 28, 2022 ang City Ordinance 2657 kun "Freedom of Information Ordinance" sa Siyudad sa Sugbo nga gipangamahan ni kanhi konsehal Eduardo Rama kinsa kongresista na karon sa ikaduhang distrito sa siyudad.

Ang maogn ordinansa unang giduso niadtong tuig 2019 ug naaprobahan kini sa konseho niadtong tuig 2022.

Ang maong ordinansa mag-cover sa tanang buhatan nga ubos sa kagamhanan sa Siyudad sa Sugbo.

Pipila sa unod niini mao ang paghatag og katungod sa katawhan nga makakuha og impormasyon sa official public records o mga dokumento nga adunay koneksiyon sa gipangbuhat sa opisyales  ingon man sa  government research data nga maoy basehan sa  policy development.

Ubos sa Section 9 sa ordinansa,  ang Public Information Officer maoy mobarog isip FOI focal person ug siya usab ang mag-oversee sa implementasyon sa ordinansa  ug moumol og standard nga pamaagi sa pagpadangat og request.

Dili mangayo og bayad ang siyudad sa pagdawat niini og request alang sa pag-access sa impormasyon nga ipaagi sa soft copy.

Apan kon mangayo kini og printed copy aduna kini gamay nga bayranan nga depende sa sukod sa papel ug sa gidaghanon niini.

Ug kung i-deny sa siyudad ang request kinahanglan nga motubag kini pinaagi sa suwat ug mopadangat og balidong rason.

Silotan ang opisyales o kawani sa kagamhanan sa siyudad nga mapakyas sa pagtuman sa ordinansa nga walay bisan unsang balidong katarungan.

Sa unang paglapas, ipaubos kini sa reprimand; ikaduha nga paglapas, mag-atubang sa suspension gikan sa usa ngadto sa 30 ka adlaw; ug ikatulo nga paglapas, mag-atubang og dismissal sa serbisyo. — BDB ( Banat News )