Cebu-Camotes nga biyahe sa Ceres Bus gitinguha sa Kapitolyo

Giduso sa Probinsya sa Sugbo ngadto sa Land Transportation Franchising and Regulatory Board Central Visayas (LTFRB-7) ang request alang sa franchise sa Vallacar Transit aron makapabyahe kini og bus pinaagi sa Cebu-Camotes nga rota.

Si Cebu Governor Gwendolyn Garcia nagkanayon nga ang Vallacar Transit nga maoy operator sa Ceres Bus Liner, miapil sa plano sa Kapitolyo nga bag-ong transportation system gikan mainland Cebu padulong sa Camotes Island.

Kini nisubay sab sa planong paglusad og byahe sa barko o Roro gikan sa pantalan sa Liloan padulong sa lungsod sa Poro Camotes Island, karong Abril 20.

“Let’s say added come-on ni sa mga pasahero, kay as I explained to Ceres, kanang Poro, naa nas taliwala. Daghan kaayo ana ang mosakay nga either moadtog San Francisco o moadtog Tudela, unya ang uban mo-cross pa gyod na ngadto sa Pilar. Ang market potential dako kaayo,” matud ni Garcia.

Una ng nasabotan ni Garcia uban ni Paul Rodriguez ang CEO sa Asian Marine Transport Corp (AMTC) ang operator sa Super Shuttle Roro ug Erik Lim ang CEO sa Topline Group nga nag operate sa Pier 88 sa lungsod sa Liloan, nga adunay roro nga mokarga og pasahero gikan sa Liloan padulong sa Camotes kon diin, mamahimo usab nga makasakay niini ang mga bus sa Ceres.

Nagtuo ang Kapitolyo nga pinaagi niini, mahatagan og alternatibo nga rota o kapilian ang mga pasahero ma lokal man o turista sa ilang pagbyahe padulong ug gikan sa Camotes Island, nga gitinguha pud karon sa Probinsya nga molambo pa ang turismo.  — MEL (BANAT NEWS)