Chinese national gitabangag dunggab
CEBU, Philippines — Gitabangan og dunggab ang usa ka Chinese national sa dili mo minos napulo ka mga tawo nga gituohang mga Chinese sab diha sa City Times Square, Brgy., Tipolo, Mandaue City niadtong Miyerkules sa hapon.
Ang biktima giila nga si Ma Yichen, 34, kasamtangan nagpuyo sa Barangay Maribago Syudad sa Lapu-Lapu. Samtang padayon pa ang kapolisan sa pag-ila sa mga lalaking gituohang mga Chinese nationals sab nga nagtinabangay sa pag-atake sa biktima.
Base sa inisyal nga imbestigasyon ni Police Staff Sergeant Frederick Andales sa Subangdaku Police Station 2, gikan sa usa ka restaurant ang biktima kauban ang iyang asawa nga si Modibel Grapa Yichen, 27.
Samtang paingon na silang duha sa parking lot gikatahong kalit lang silang gilibotan sa mga lalaki ug walay daghang estorya gitabangan nila og dunggab ang biktima ug duna say mihapak og bato kaniya.
Dihang nagka-komosyon na, dali-daling nangikyas ang mga lalaki ug wan a igkita. Ang biktima gitabangan sa mga tawo aron madala sa tambalanan human nakaangkon og grabeng bun-og sa kalawasan ug daghang samad dinunggaban.
Ang kapolisan sa Subangdaku Police Station padayon pang naghimo og imbestigasyon bahin sa maong hitabo. Usa sa ilang gisusi ang background sa biktima nga makatabang sa pagsubay sa motibo sa maong krimen.— IBM (BANATNEWS)
- Latest
