P3 milyones kantidad sa shabu nga nasakmit  atol sa anti-illegal drug operations

CEBU, Philippines —  Nikabat ngadto sa P3 milyones ang kinatibuk-ang kantidad sa shabu nga nasakmit sa 14 ka anti-illegal drug operations sa kapolisan sa Lapu-Lapu City Police Office gikan niadtong Disyembre 5 hangtud Disyembre 11, 2022.

Si Police Colonel Elmer Lim, direktor sa LLCPO nagkanayon nga sa kinatibuk-an nakasakmit sila og 446.22 gramos nga shabu atol sa gipahigayon nila nga mga anti-illegal drug operations.

Matud ni Lim nga 14 ka pusher ang ilang nadakpan kinsa upat niini ilang giila nga high value individuals.

Lakip sa HVI nga ilang nadakpan mao sila si Christopher Moral alyas "Loloy" ug Jaime Bentulan Baro, pulos residente sa Dakbayan sa Lapu-Lapu.

Nasakmit ang 155 gramos nga shabu gikan kang Moral nga nikabat ngadto sa P1 milyon ang kantidad ug 120 gramos usab ang nasakmit gikan kang Baro nga nikabat ngadto sa P816,000 ang kantidad.

Matud usab ni Lim nga gihingusgan usab nila ang kampaniya batok sa ilegal nga sugal diin niabot ngadto sa 39 ka tawo ang nasikop atol sa 10 nila ka operasyon batok sa iIegal nga sugal diha sa nagkaiyang dapit sa siyudad. (BANAT NEWS)