Mga tinun-an sa Talisay City dili na pugson pagpasuot og facemask
CEBU, Philippines — Dili na pugsanay ang pagpasuot og facemask sa mga tinun-an sa mga tulunghaan sa Dakbayan sa Talisay.
Si Bise Mayor Richard Francis “Choy” Aznar nibutyag nga memorandum kini nga gihimo sa nasudnong pangangamhanan nga kinahanglan nga sunod.
Matud pa ni Aznar nga kadtong mga bata nga komportable na nga di magsul-ob og face mask dili na kini sukit-sukiton.
Asoy pa sa bise mayor nga ang mga ginikanan nay magbuot kung pasul-obon ba nila o dili og face mask ang ilang mga anak.
Ang pagtuman sa kamanduan mao ang paglikay unya sa lalis sa mga ginikanan ug kadagkuan sa pampublikong tunghaan.
Hinuon sa pagkakaron walay nadawat nga reklamo o lalis si Aznar labot niini nga gipugos sa magtutudlo o tunghaan ang mga tinun-an nga pagsul-ob sa face mask.
Dugang pa ni Aznar nga unta motuman ang tanan sa kamanduan. (BANATNEWS)
- Latest
