Gipatay tungod sa selos

CEBU, Philippines — Tungod sa pangabubho usa ka 23-anyos nga ulitawo ang nisaulog sa iyang adlaw nga natawhan sa sud sa prisohan kagahapong adlawa Oktubre 21,2022 tungod sa pagpusil patay niini sa karelasyon sa iyang menor de edad nga uyab.

Natanggong karon sa prisohan sa Talisay City Jonar Villagonzalo kinsa maoy gitumbok nga nagpusil patay sa tindero sa Tabunok Public Market sa Talisay City niadtong nakalabay nga adlaw nga Martes.

Migawas sa imbestigasyon sa kapolisan nga nagselos ang suspek kay ang biktimang si Alvin Cinco Cuer,19, gikarelasyon sa uyab niini nga 15-anyos.

Sigon sa hepe sa kapulisan sa dakbayan sa Talisay Lt. Col. Randy Caballes miangkon matud pa sa ilaha ang suspetsado sa maong krimen gamit ang kalibre .45 pistolang napalit niini og P12 mil sa higala.

Ang suspek ug ang maong menor de edad siyam ka buwan ng uyab apan sa miaging buwan giingong nakigbuwag ang babaye. Apan nahibaw-an sa suspek nga nagkarelasyon na ang babaye sa biktima.

Matud pa makadaghang higayon nga gisuwayan sa suspek nga mabawi ang babaye ug mihangyo pa sa duha aron magkabalik silang duha. Hangtud nga naabot pa sa punto nga gihangyo niya ang duha nga magbuwag aron dili magkagubot.

Apan ang tanan gikatahong wala paminawa sa duha hinungdan nga gikasuko kini sa suspek.

“Base sa statement sa suspect ang nakigbuwag ang babaye unya siya dili gyud mosugot kay according sa iyaha nahigugma gyud siya. Kini atong suspect naghatag na ni siya og threat sa iyang girlfriend ug sa katong victim nato nga if they will continue allegedly sa ilahang relationship something bad might happen to both of them,” sigon ni Caballes.

Ang suspetsado ug ang biktima  managkaila ra ug duna sila’y contact sa usag-usa.

Human sa pagpamusil, midiretso ang suspek sa iyahang mga kabanay sa Lungsod sa Minglanilla. Apan nailhan kini ug natultolan sa kapolisan iyang ginikanan kinsa mitabang sa pagpatahan kaniya.

Sa pagkutlo ning maong balita padayon pa nga gipangita sa kapulisan ang armas sa suspek kay matod pa nalabay niya kini gumikan sa kahadlok.

Ang suspetsado matud pa duna na say record kaniadto kay giingong duna kini nakulatahan ug nadunggaban sa probinsiya. —/IBM (BANAT NEWS)