Gradwado sa DMDP sa Cebu City malaumong makatrabaho

CEBU, Philippines — Niabot ngadto sa 96 ka graduating students sa Cebu City Department of Manpower Development and Placement (DMDP) ang nipaubos sa “employment readiness seminar” aron maandam sila sa pagpanarbaho.

Nitambong  ang mga estudyante sa technical ug vocational courses nga gitanyag sa DMDP sama sa security, housekeeping, electrical installation, automotive, computer system, ug refrigeration.

Sa report sa Public Information Office (PIO) sa Dakbayan sa Sugbo, si Mauricio Cabatino, training division head sa DMDP, miingon nga ang tuyo sa maong seminar mao ang paghatag og ideya sa mga tinun-an kun unsay mahitabo sa ilang pagsugod sa pagtrabaho.

Ang employment readiness seminar gipahigayon sa miaging adlaw ,  sa wala pa ang gradwasyon sa mga estudyante sa Technical, Vocational Education Training.

“In time ma-employ na sila after graduation. Ang technical mo-graduate next week. Maong preparatory ni siya ang employment readiness seminar, three weeks from now mo-graduate pud ang four months,” nagkanayon si  Cabatino.

Giimbitar sa DMDP ang Department of Labor and Employment-7, Philippine Overseas Employment Authority, Social Security Services, Department of Trade and Industry, Pag-Ibig, ug PhilHealth alang sa seminar.

Nitambong usab si Konsehal Edgardo “Jaypee” Labella II, kinsa nipasalig nga mangita siya og paagi aron makasulod dayon og trabaho ang mga tinun-an.

Si Labella maoy chairman sa committee on labor, employment, cooperative, ug livelihood sa City Council.

“Ako man gud usa ko ka trainor sa una. Kahibaw gyud ko sa kalisud sa experience nga nag-training. Inig human og training way padulngan,” matud pa sa konsehal.

Gibutyag ni Labella nga nakigsabot na siya sa DMDP ug ubang mga buhatan sa nasudnong kagamhanan, sama sa Department of Information and Communications Technology (DICT) alang sa maong katuyoan.

Lakip sa 96 ka mga tinun-an mao si Rutchelle Maturan, taga Barangay Apas, kinsa mikuha sa kursong housekeeping.

Matud pa ni Maturan nga nagtrabaho siya kaniadto isip merchandiser apan human niini wala na siya mangita og laing trabaho tungod kay nag-atiman siya sa masakiton niyang bana ug sa tulo nila ka mga anak. Karon nga hapit na siya mograduwar, mangita dayon siya og trabaho, ug nagplano nga mo-apply sa usa ka hotel ug makatraabaho sa gawas sa nasud .— IBM (BANATNEWS)