Kapolisan, kabomberohan nipahimangno pagsugat sa bag-ong tuig

CEBU, Philippines — Gipahimangnoan sa kapolisan ug kabomberohan sa Siyudad sa Lapu-Lapu ang mga molupyo nga mag-amping sa paggamit sa pagpabuto sa firecrackers o pyrotechnics sa pagsugat  sa tungang gabii  sa bag-ong tuig.

Nunot niini, si Police Lieutenant Colonel Christian Torres, tigpamaba sa Lapu-Lapu City Police Office nipahimangno usab ngadto sa mga Oponganon sa ilang pagsugat sa tungang gabii sa bag-ong tuig nga gidili ang pagpabuto og armas.

Matud ni Torres nga bisan og adunay lisensiya dakpon man gani ang magpabuto labaw na kadtong mga walay lisensiya nga magpabuto sa armas.

Kini ang gidangatan sa usa ka barangay tanod sa Barangay Basak sa maong siyudad kinsa nagpabuto sa iyang armas sa niaging pagsugat sa pasko.

Ang maong tanod nadakpan sa mga sakop sa Special Weapon and Tactics (SWAT)  nga nitubag sa alarma.

Kabahin sa mga nabiktima sa pabuto base sa talaan sa LCPO hangtud sa Disyembre 26 adunay lima ug ubos lang kini og usa sa tuig 2023 nga adunay natala nga unom ka biktima.

Samtang ang kabomberohan sa siyudad nga gipangulohan  ni Fire Superintendent Tito Purgatorio  ang kusganon usab nga nagpahimangno sa mga Oponganon nga sa pagsugat sa tungang gabii sa bag-ong yuig kon magpabuto og firecrackers o pyrotechnics kinahanglan nga adto sa layo sa mga balay sa paglikay sa sunog. — /BDB (BANAT NEWS)