Mga establisamento sa Cebu City giawhag nga patabangon sa public schools

CEBU, Philippines — Nanawagan si Cebu City Councilor Joel Garganera, pangulo sa Emergency Operations Center sa business establishments nga nahisakop sa mga barangay nga adunay public schools nga mo-adopt og tunghaan ug tabangan sa pagbangon human kini naapektohi sa bagyong Odette.

Nasayran nga dunay 13 ka public schools sa Cebu City diin kasagaran anaa sa bukirang barangay sa dakbayan nga magsugod na unta sa ilahang face-to-face classes niining buwan apan wala nadayon tungod kay ang mga eskwelahan nangaguba sa bagyo.

Matud ni Garganera nga sa pakighinabi niya sa Department of Education Cebu City ang pundo nga anaa nila alang pa lang sa clearing sa mga tunghaan ug wala pay labot ang sa rehabilitation.

Samtang ang Local School Board dili usab makaato sa tanan sa pag-rehabilitate sa mga tunghaan tungod kay daghan kini ug kuwang usab sila og mga personnel.

Ug gumikan niini si Garganera nanawagan sa business establishments nga unta matabangan nila ang mga tunghaan dili lang sa construction materials lakip na sa manpower.

Ang mga tunghaan nga mag face-to-face classes na unta mao ang Sibugay Integrated School, Pamutan Integrated School, Mangabon Elementary School, Cantipla Integrated School, Tabunan Integrated School, Sinsin National High School, Deosis Elementary School, Lusaran National High School, Tagbao National High School, Taptap Integrated School, Sinsin Elementary School, Adlaon Integrated School ug Bitlang Integrated School. BDB (BANATNEWS)