Mga estudyante ug magtutudlo apektado sa landslide

CEBU, Philippines — Gihangyo ni Talisay City Mayor Samsam Gullas nihangyo sa Department of Education nga kadtong mga apektadong tinun-an ug magtutudlo sa landslide sa Manipis nga adto lang usa sa duol nga eskwelahan motambong o kaha mag modular classes.  Kini human nga gipasirad-an ang Sitio Santol sa Kampo 5, Barangay Kwatro- Talisay-Toledo Wharf Road tungod sa padayon nga pagdahili sa yuta sa maong dapit.

Nakighinabi na si Gullas sa DepEd diin kadtong mga apektado nga tinun-an ug magtutudlo tungod sa landslide mahimo ra ang mga magtutudlo moadto sa laing eskuylahan nga mahimo nilang kaadtoan samtang ang mga tinun-an mag modular classes samtang dili pa  luwas agian ang Manipis road.

Sa sunod semana pa mahimong maagian ang maong dalan base sa pamahayag sa Department of Public Works and Highways ug sa ubang ahensya sa gobiyerno human sa ilang meeting niadtong Miyerkules sa hapon.

Si Gullas, nihangyo sa mga molupyo sa Barangay Manipis ug sa mga mag-agian sa maong dapit nga dili sa mopugos kay para usab kini sa ilang kaluwasan.

Dili mominos sa siyam ka purok sa Barangay Manipis sa Dakbayan sa Talisay ang apektado sa landslide.

Sa inisyal nga ihap moabot ngadto sa kapin 500 ka mga panimalay sa Barangay Manipis nga dunay populasyong kapin dos mil ang apektado sa pagdahili sa yuta ug bato nga nitabon sa dan.

Matud pa ni Konsehal Emma Cabiluna, sa Barangay Manipis, Huwebes sa buntag pipila gyud ang nipugos sa pag-agi sa nahawan nga parte sa dalan.  Sumala pa ni Cabiluna, matag karon ug unya aduna gihapoy pagdahili sa yuta gikan sa maong nihulpa nga parte sa bungtod.

Ang pangulo sa City of Talisay Traffic Operation Development Authority Jonathan Tumulak, nirekomendar sa DPWH nga pabutangan na gayud og barrier sa dan 30 ngadto sa 50 metros gikan sa lugar nga natabunan og yuta aron di maagian. Siyam ka mga purok sa Barangay Manipis nga apektado sa landslide ang makadawat og hinabang sumala pa ni Cabiluna. Ang landslide mitumaw niadtong Miyerkules sa kadlawon human sa pagbunok sa uwan. Ang Department of Public Works and Highways (DPWH) nipahibawo nga 24 oras nga ilang hawanan ang karsada sa mga yuta ug bato nga mitabon.

Apan base sa rekomendasyon ni Engr. Lesley Molina di una gyud nila pa agi-on ang mga motorista sud sa usa ka semana. (BANAT NEWS)