Gunman ni Buscaino gipasakaan na og kaso
CEBU, Philippines — Gipasakaan na og kaso sa Cebu City Police Office (CCPO) ang gunman ni Richard Buscaino, kanhi Calamba Councilman ug kanhi Grand Skeptron sa Alpha Kappa Rho Fraternity kinsa gibanhigan diha sa dalan Tres de Abril, Barangay Calamba, Cebu City niadtong Oktubre 8,2021.
Si Lt. Colonel Maria Theresa Macatangay information officer sa CCPO miingon nga ilaha nang gipasaka ang kasong pagpatay niadtong miaging semana batok sa gunman kinsa positibong giila sa mga saksi.
“Unfortunately I cannot tell you kung kinsay pangan aning mao nga gunman, because what we also want to uncover og unsa gyuy estorya nganong gipatay siya,” matud ni Macatangay sa usa ka pakighinabi kagahapon (Martes).
Dugang pa niya, matubag lang kini kung madakpan na ang maong gunman.
Giangkon usab ni Macatangay nga wala pa nila matumbok ang mga kauban sa gunman nga nagmaneho sa getaway vehicle.
“We have the evidence already and these are good pieces of evidence that we have submitted before the court,” matud ni Macatangay.
Giingong namay-ongan ang suspek sa dihang gitangtang niini sa makadiyot ang facemask diha sa crime scene.
“To the surprise of those who were around, pagkahitabo, and when nagpakita sila sa video, gipakita sila sa rogue’s gallery sa PNP, katong mga nadakpan before, witness was able to identify the suspect bisan unsaon nato og hatag niya og pictures, mao juy iyang itudlo,” ni Macatangay pa. Sa pagkakaron, gipaabot na lang sa CCPO ang warrant of arrest nga ipagawas sa korte aron sikupon ang gunman.
Sa ilang gihimong background check sa suspek nalambigit sab kini sa laing mga krimen kaniadto. Hinuon miingon si Macatangay nga dili pa nila masuta kon aduna bay laing nagpaluyo sa suspek o kun gisugod lang kini paghimo sa krimen.
Gibanhigan si Buscaino sa giingong riding-in-tandem samtang ang gisakyan niini gi-park sa nahisgutang lugar.— IBM (BANATNEWS)
- Latest
