CCPO duna nay duha ka testigo sa pagpatay kang Buscayno
CEBU, Philippines — Duna nay duha ka mga testigo nga nakuha ang kapolisan may kalabotan sa pagbanhig kang Richard Buscaino, kanhi konsehal sa Barangay Calamba sa Cebu City ug Board of Trustees sa Alpha Kappa Rho Fraternity niadtong Oktubre 8, 2021 diha sa Tres De Abril Street sa maong barangay.
Matud pa ni Police Lieutenant Colonel Wilbert Parilla, Deputy Director for Operations sa Cebu City Police Office aduna silay duha ka mga saksi nga mopirma na unya sa ilang mga giluwatan nga pamahayag.
Gipaabot pa usab sa kapulisan ang pamilya ni Buscaino nga mopatim-an sa buhatan sa kapulisan aron magsilbi nga complainant sa kasong murder nga giandam karon batuk sa mamumuno.
Gitug-an ni Parilla, kung mahuman na ang mga affidavits ug uban kinahanglanon, hingpit na unya nilang mapasaka ang formal nga kasong murder batuk sa mamumuno unya.
Ang giingong gunman nalambigit usab sa laing mga kaso sa pagpatay ug gisubay karon kun duna kini pending nga mga warrant of arrest.
Personal nga bangi ang gitutukan karon sa kapulisan nga motibo sa pagpatay sa usa sa mga labaw sa Akhro apan walay kalabotan ang panagribal sa ubang fraternity.— IBM (BANATNEWS)
- Latest
