Siyam namatay sa COVID-19 sa unang adlaw sa Septiyembre

CEBU, Philippines — Siyam ka tawo ang namatay sa sakit dala sa komplikasyon sa Covid-19 dinhi sa siyudad sa Sugbu sa unang tulo ka adlaw ning bulan sa Septiyembre base kini sa natala sa Emergency Operations Center (EOC) sa siyudad.

Si Konsehal Joel Garganera, deputy chief implementer sa EOC, miingon nga niadto lang Septiyembre 3, 2021 dunay lima nga nadugang sa talaan sa mga nakalas.

Gipakita usab sa datos sa EOC nga ang natalang nangamatay gumikan sa maong sakit sa bulan sa Agosto miabot og 280, hapit kini mi- triple sa natala niadtong bulan Hulyo nga 88 ang nakalas.

Ang kinatibuk-ang namatay sa syudad sukad nagsugod ang pandemiya niabot na og 1,255.

Sa laing bahin, giingon ni Garganera nga ang syudad naa na sa ika-11 ka adlaw diin ang daily positivity rate ubos na sa 20%. Kaniadtong Septyembre 3,dunay natala nga 182 ka bag-ong kaso hinungdan nga ang siyudad duna na karoy 2,260 ka aktibong kaso.

Samtang, 470 sab ang mga bag-ong recoveries ug karon niabot na tanan og 34,888. Giingon ni Garganera kaniadtong Septyembre 1, ang hospital occupancy sa syudad naa sa 70.3 % o 702 beds ang okupado na, samtang sa Septyembre 2 nagpakita nga 65 % o 632 beds ang giokupar.

“That’s a reduction of around 70 beds for our 15 hospitals in the City, 4 public and 11 private,” matod ni Garganera.

Bisan pa niini, padayon nga gipahinumdom ni Garganera ang publiko nga magpadayon nga mabinantayon ug mag-obserbar sa minimum health protocols.

“Just the same, COVID is still very much around so at any time, if we tend to be complacent, it will spike. Hapit na ang Pasko palihug tuman intawn mo sa atong mga health protocol,” segun ni Garganera.

“Maluoy mo sa atong mga health frontliners, mga protocol enforcers, business sector, atong gobiyerno ug ang publiko nga dugay na nag-antos ning pandemya,” dugang niya. (BANAT NEWS)