64 ka polis bag-ong naka-recover sa COVID-19

CEBU, Philippines — Emosyonal nga nihatag sa iyang mensahe ang direktor sa Police Regional Office (PRO)-7 Police Brigagdier General Albert Ferro ngadto sa 64 ka polis nga bag-ong recoveries sa covid-19.

Wala mapugngi ang pagtulo sa luha ni Ferro tungod sa pagka-recover sa maong mga polis gikan sa ilang usa ka buwan nga pakigbatok sa covid-19.

“Ït’s truly a beautiful day”, matud ni Ferro.

Giangkon ni Ferro nga pila na usab ka adlaw nga wala siya’y tarong tulog sa pagsige og hunahuna ug pag-ampo sa mga polis nga giisip niya nga mga anak ubos sa iyang pagdumala isip direktor sa PRO-7.

Ang mga polis nga naka-recover gikan sa covid-19 andam na usab kining mobalik og serbisyo sa publiko.

Kapin sa 130 na ka polis sa PRO-7 ang naka-recover sa 302 nga nataptan sa covid-19.

Si Ferro niawhag sa publiko nga motabang sa pakigbatok sa covid-19 pinaagi sa pagtuman sa mga protocol.

Sa laing bahin, nikabat ngadto sa 14 ka pasyente sa covid-19 sa Lungsod sa Daanbantayan ang naka-recover na.

Sa pagkakaron ang lungsod aduna na lang kini duha ka active cases nga natala.

Gikataho nga ang mga naka-recover na nagpangedaron kini og 8-anyos hangtud sa  63-anyos diin kasagaran kanila taga Barangay Poblacion sa maong lungsod.

Niining ulahi, nigawas na ang resulta sa swab test sa lima ka close contact sa DB patient 16 diin upat kanila ang negatibo ug usa ang positibo sa covid-19.

Samtang sa Lungsod sa Oslob wala nay active cases sa covid-19 human nga naka-recover na ang tanang siyam ka covid-19 patients sa lungsod. Le Phyllis F. Antojado/BDB (BANATNEWS)