Piyesta sa Ginatilan gihugopan sa mga deboto

CEBU, Philippines — Bisan sa hulga sa coronavirus diease, wala mahulga ang mga deboto sa San Gregorio Magno sa Lungsod sa Ginatilan sa paghugop sa kapistahan niini niadtong Domingo.

Gipakita gihapon sa bagang duot sa mga deboto ang hugot nilang pagtuo atol sa Santos nga Misa nga gipangulohan ni Fr. Eduardo Ventic uban sa kaparian sa Archdiocese of Cebu.

Sa wala pa ang Santos nga Misa ang mga tawo nagbutang og sanitizers sa ilang mga kamot diin mismo si Mayor Dean Michael Singco uban sa iyang kapikas sa kinabuhi nipaubos usab sa precautionary measures nga gipatuman sa simbahan uban sa abag sa local government unit nga gipahimutang sa mga pultahan sa simbahan.

Gidasig ni Ventic ang mga magtutuo nga mosunod sa gipatuman nga precautionary measures sa simbahan batok sa COVID-19. Giawhag ni Ventic ang mga magtutuo nga padayon lang sa pag-ampo tungod kay ang virus dili kalupig sa gahum sa Ginoo.

Human sa Santos nga Misa nagpahigayon gihapon sa pag-sanitize sa ilang kaugalingon ang mga manimbahay ug gidasig usab kini sila nga dili nalang mohalok ngadto sa Santos. /GMR (BANATNEWS)