Luna sa ‘tore’ gisugdan na og tambak

CEBU, Philippines – Gisugdan na sa grupo sa mga hauler operators ang pagbubo og anapog ug yuta sa kinawtan nga luna sa tukuron unta nga 20-storey resource center sa Kapitolyo.

Matud ni Atty. Frank Dinsay nga moabot na sa 36 ka dump trucks ang nabubo sa lugar sulod sa Capitol compound niadtong Miyerkules sa gabii.

Ang giabuno nga yuta gikan kini sa mga konstruksiyon sa Dakbayan sa Sugbo diin nag-operate ang mga operators sa Visayas Truckers Equipment and Quarry Operators Services Cooperative.

Ang maong kooperatiba maoy nipadangat og interes sa Kapitolyo nga boluntaryo nga motambak og yuta sa dakung kinawtan nga walay bayad.

Moabot sa 18,000 cubic meters nga yuta ang igo aron nga mabalik sa level ground ang maong site o moabot sa 1,000 ka trucks ang kinahanglan mabubo sa maong dapit.

Usa sa mga sakop sa kooperatiba nagkanayon nga didto sa Mandani Bay moabot sa 10,000 cubic meters ang kinawot nga maoy gibahin-bahin sa mga truckers.

Ang excavated soil sa Mandani Bay maoy usa sa tinubdan sa mga truckers sa yuta nga itambak sa site sa Kapitolyo apan matud ni Atty. Marino Martinquilla, legal consultant sa Kapitolyo, nga wala pa makakuha didto sanglit aduna pay problema sa mga requirements nga kinahanglan sulbaron ilabi na nga gikan sa Dakbayan sa Mandaue ang yuta.

Matud ni Martinquilla nga gusto sa gobernador nga mapadali ang pagbalik sa nabiyaan nga site ilabi na nga aduna nay nahugno nga mga edipisyo sa pipila ka dapit sa dakbayan. (/GMR)(BANAT NEWS)