Tumulak: Estriktong balaod sa trapiko ipatuman sa Talisay
CEBU, Philippines — Niining paglingkod sa bag-ong traffic czar sa Dakbayan sa Talisay lauman sa mga motorista ang estriktong pagpatuman sa balaod sa trapiko diha sa kadalanan sa siyudad.
Kini maoy gitug-an ni Joy Tumulak kinsa gitudlo nga traffic czar ni Mayor Gerald Anthony “Samsam” Gullas.
Matud ni Tumulak nga dakong hagit kini kaniya ang bag-ong posisyon.
Nagkanayon si Tumulak nga dili masulbad ang dakong problema sa trapiko sa Talisay kong dili motabang ang katawhan hinungdan nga gihangyo niya ang tanang sektor nga motabang aron masulbad ang maong problema.
Ang balaod sa trapiko kinahanglan nga ipatuman aron makita ang kausaban sa kadalanan sa Dakbayan sa Talisay.
Matud usab ni Tumulak nga sa umaabot nga adlaw ang mga magmotorsiklo nga moagi sa kadalanan sa siyudad o ang mga taga Talisay mismo kinahanglan nga magsul-ob na gyud kini og helmet.
Si Tumulak gikatakdang makigdiyalogo sa mga drayber sa traysikol ug traysikad labot sa natampo niini sa trapiko.
Samtang si Mayor Gerald Anthony “Samsam” Gullas nagkanayon nga iyang gihatag ang tanang katungod ni Tumulak aron matutokan ang trapiko. (BANAT NEWS)
- Latest
