Kapitolyo mopalit og ekipo sa engineering lab sa duha ka tunghaan sa CTU

CEBU, Philippines — Mopalit ang Probinsya sa Sugbo og mga ekipo sa engineering laboratories sa duha ka campus sa Cebu Technological University (CTU) sa lungsod sa Tuburan ug Danao.

Kini human nga sobra 600 ka mga graduates sa engineering sa maong mga tunghaan ang dili makakuha og licensure examination.

Ang CTU President nga si Dr. Joseph Pepito nagkanayon nga ang Commission on Higher Educaton (CHED) mi deny sa aplikasyon sa unibersidad alang sa Certificate of Program Compliance (COPC) tungod sa kakulang sa duha ka campus og mga ekipo sama sa testing machines ug uban pa,alang laboratories sa civil, mechanical ug electrical engineering programs niini.

Ang COPC usa sa mga rekisitos nga gilatid sa CHED sa mga state universities and colleges (SUCs) ug local universities and colleges (LUCs) aron makatuman sa polisiya sa standard ug guidelines nga gilatid sa maong ahensya.

Ang Professional Regulation Commission (PRC) wala na usab modawat og aplikasyon alang sa licensure examination gikan sa mga SUCs ug LUCs nga walay COPCs.

Aron masolusyonan ang maong suliran sa duha ka tunghaan, midesisyon ang Kapitolyo nga mopalit sa mga gikinahanglan nga ekipo.

“Kaning mga estudyanteha, mga pobre man ni kaayo sa tanan, naninguha na intawn ni maka-gradwar, mahimong mga engineer kay mapa-arang-arang ang kinabuhi intawn, kahimtang sa ilang mga pamilya,” matud ni Garcia, sa taho sa Sugbo News.

Si Pepito usab nagkanayon nga kon mapalit na ang maong mga ekipo, isumiter nila sa evaluation sa ilang programa.

Aron mapormal ang maong nauyonan, usa ka memorandum of agreement ang pirmahan sa Probisya sa Sugbo ug sa CTU alang sa pagpalit sa maong mga ekipo. —  MEL BANAT NEWS