Pagpahigayon og job fair matag buwan gisugyot sa konseho

CEBU, Philippines — Gipasiugdahan sa Sangguniang Panlungsod sa Dakbayan sa Sugbo ang usa ka sugyot nga nag-awhag sa Department of Manpower Development and Placement (DMDP) sa pagbuhat og pagtuon kabahin sa posibilidad sa pagpatuman og job fair matag buwan.

Ang sugyot giluwatan ni Konsehal Rey Gealon atol sa sesyon sa konseho nga nahiuyon sa tinguha sa nasudnong gobyerno nga maminusan ang unemployment rate.

Sumala sa resolusyon, si Presidente Ferdinand Marcos Jr., sa iyang pakigpulong atol sa 2025 Jobstreet Career Con, mipadayag nga gikonsiderar sa gobyerno ang pagpatuman og matag-buwan nga job fair sa tibuok nasud aron mapakunhod ang kawalay trabaho.

Gipunting ni Marcos nga padayon ang paningkamot sa gobyerno sa pagpalambo sa mga inisyatiba sa pagpangita og trabaho, lakip na ang paghatag og dekalidad nga mga bakanteng trabaho.

Base sa datos sa Philippine Statistics Authority (PSA) pinaagi sa Labor Force Survey (LFS), ang unemployment rate sa Pilipinas niadtong Disyembre 2024 mikunhod ngadto sa 3.1 porsyento, gikan sa 3.2 porsyento niadtong Nobiyembre 2024.

Kini nagpasabot nga adunay 1.63 milyones ka mga Pilipino nga walay trabaho niadtong Disyembre, mas ubos kumpara sa 1.66 milyones niadtong Nobiyembre.

Ang employment rate niadtong Disyembre 2024 misaka ngadto sa 96.9 porsyento o 50.19 milyones ka mga Pilipino nga dunay trabaho, gikan sa 96.8 porsyento o 49.54 milyones niadtong Nobiyembre 2024.

Samtang sa Central Visayas, sumala sa Philippine Statistics Authority (PSA) Region 7, ang unemployment rate anaa sa 2.9 porsyento niadtong 2024 gikan sa 4.6 porsyento niadtong 2023.

Ang employment rate niadtong 2024 misaka ngadto sa 97.1 porsyento gikan sa 95.4 porsyento niadtong 2023.

Apan bisan pa sa pagkunhod sa unemployment rate sa nasud ug rehiyon, matud ni Marcos nga padayong nagbag-o ang kahimtang sa labor market, uban sa mga kompanya nga nag-adjust sa ilang mga rekisito sa pag-hire. Agi'g tubag, gihangyo sa Cebu City Council ang DMDP sa pagbuhat og pagtuon kabahin sa posibilidad sa pagpatuman og binuwan nga job fair, aron mas mapakunhod pa ang unemployment rate. — MEL BANAT NEWS