Petisyon sa usbaw sa suhulan wa pa dawata sa RTWPB-7
CEBU, Philippines — Wala pa dawata sa Regional Tripartite Wages and Productivity Board 7 ang petisyon alang sa P150 matag adlaw nga usbaw sa sweldo sa mamumuo sa Central Visayas.
Atol sa tigum kagahapon, matud ni Jose Tomongha, usa sa labor representatives sa RTWPB-7, nga mopresentar pa ang nagkada-iyang ahensiya sa gobiyerno sa economic conditions sa Region 7 sa sunod tigum sa Nobiyembre 19.
Dugang ni Tomongha nga basin sa Disyembre na makita gyud nila nga adunay mga supervening conditions human sa presentasyon sa mga economic conditions.
Lima ka workers’ groups ang nipasaka sa ilang hiniusang petisyon sa niaging buwan nga naglangkub sa Cebu Labor Coalition, Lonbisco Employees Organization, Nagkaisang Lakas ng Manggagawa-Katipunan, Metaphil Workers Union ug Unionbank Employees Association.
Matud sa mga petitioners nga sukad giimplementar ang Wage Order 21 niadtong Agosto 3, 2018, aduna nay mga supervening conditions nga nitumaw nga angayan lang pasakaan na usab ang sweldo sa mga mamumuo.
Kini naglakip sa padayong pagsaka sa presyo sa lana ingon man sa mga nag-unang palaliton, pagsaka sa bayranan sa tunghaan ug uban pa.
Ubos sa balaud sa RTWPB nga dili tagdon ang usa ka petisyon kung wala pa moabot og usa ka tuig ang implementasyon sa katapusang Wage Order.
Apan pwedeng ikonsiderar sa wage board ang bag-ong petisyon kung makita nila nga adunay nga presensiya sa gitawag og supervening conditions. (BANAT NEWS)
- Latest
