Kapitan bas gipatay

CEBU, Philippines — Patay ang 42-anyos nga kanhi kapitan sa Barangay Lagtang Talisay City nga apil sa gipangalanan ni Pres. Duterte nga narco-politician diha sa sulod sa giabangan niining balay sa Sitio Dumlog, Barangay Simala sa Lungsod sa Sibonga ug kagahapon na sa buntag nadiskubrehan ang krimen.

Matud pa ni Senior Police Officer 4 Darline Banogo, Deputy Chief of Police sa Sibonga Police Station ang gipatay mao si Marc Ferdinand Bas. Matud niya may mga nagbilar og patay sa maong lugar ang nipahibalo bahin sa buto-buto sa armas nga ilang nadungog.

Apan pag-abot sa mga polis walay nasayod kon asa gyud eksakto nga balay gikan ang mga buto maong namalik sila sa police station.

Apan sayo kagahapon sa buntag  gipahibalo sila sa ig-agaw ni Bas ug igsuon sa kapuyo niini bahin sa krimen. Nag-ubo na sa kwarto sa ikaduhang andana si Bas ug nabulit og samad pinusilan ang kalawasan dihang giadto sa mga polis.

Ang mga kriminal migamit og tangke sa LPG aron gub-on ang pultahan sa balay aron makasulod. Nakuha sa crime scene ang usa ka tablet, tangke sa LPG, mga ID ni Bas ug lakip ang usa ka cellphone apan dunay nawala nga laing cellphone matud pa sa mga kabanay.

Ang kapuyo ni Bas wala mohatag og pamahayag sa media apan ang caretaker sa balay miingon nga nagpaila si Bas kanila nga “Japz” ug P3 mil ang abang niini matag buwan sa tibuok balay.

Ang mga residente sa lugar wala makaila ni Bas kay dili kini tigawas-gawas sukad kini nipuyo niadtong Hulyo 5 ning tuiga. Si Bas maoy amahan ni Lagtang barangay kagawad Art Stephen Bas, 23, kinsa gipatay niadtong Hulyo 20 ning tuiga sa Cebu South Coastal Road samtang kini padulong sa iyang tulonghaan.

Hangtod karon wala pa nasulbad ang maong kaso.

Sa iyang bahin, si Chief Supt. Debold Sinas, direktor sa Police Regional Office-7 nagdudang sindikato sa drugas ang mipatay kang Bas ug ang pagtago niini timailhang nakadawat kini og hulga sa kinabuhi. (BANAT NEWS)