Lima sikop sa drug raids; Montebon nalambigit sa drugas ug ubang kaso

CEBU, Philippines – Tulo ka tawo sikop lakip na niini ang managkapuyo sa gipahigayong drug operation niadtong Martes sa hapon sa kapolisan sa Dakbayan sa Talisay diha sa Sitio Magay, Barangay Tanke sa  nahisgutang siyudad.

Ang mga nasikop mao sila si Ricardo Fernandez, 42-anyos, mananagat ug ang kapuyo niini nga si Erish Sanchez, 30, ug laing lalaki nga si Julius Tapales, 25, ang tulo parehong nagpuyo sa maong dapit.

Si PO1 Carl Sebial sa Talisay City Police Station nagkanayon nga nagpatrolya ang sakop sa Regional Mobile Force Battalion (RMFB) sa maong lugar dihang si Sanchez nga nakalitan sa pagkakita sa mga otoridad kalit nga nikaging ug niitsa sa ilegal nga drugas.

Samtang ang kapuyo niini nga si Fernandez nga nag-inom og soft drinks sa daplin ang natuk-an sa dihang gidakop na si Sanchez.

Giingong nakuha gikan kang Fernandez ang 15 ka gagmay nga pakete sa shabu; 50 ka gagmay nga pakite sa shabu gikan kang Sanchez samtang upat ka gagmay nga pakete sa shabu gikan kang Tapales.

Sa laing bahin, nasikop ang duha  ka gikatahapang pusher og shabu sa buy-bust operation sa kapolisan sa Presinto 3 sa Lapu-Lapu City Police Office (LLCPO) diha sa Sitio Sacred Heart, Barangay  Gun-ob sa miaging gabii.

Ang mga suspetsado mao sila si Rachel  Bregente, alyas  “Boboy”, 22, taga Sitio  Capricorn, Barangay Pajo sa maong dakbayan ug Noeh Baril, 32, taga Purok Molave, Barangay Cogon sa Lungsod sa Liloan.

Giingong nasakmit sa kapolisan gikan sa maong mga suspetsado ang duha ka medium size ug 12  ka gagmay nga paketeng shabu ug drug paraphernalia. Sa laing bahin usab, tulo ka anggulo ang gisubay karon sa kapolisan sa Dakbayan sa Mandaue nga motibo sa pagpusil patay sa managkapuyo sa Barangay Paknaan, Dakbayan sa Mandaue.

Ang maong mga motibo naglangkob sa ginadiling drugas, personal nga bangi ug love triangle. Nasayran nga si Jessie Montebon anaa sa watch list sa Basak Police Station ug bag-o kini nga naila nga usa ka drug personality matud ni Mandaue City Police Office Director Senior Superintedent Julian Entoma.

Gibutyag ni Entoma nga gawas sa reklamo nga ilang nadawat nga si Montebon nalambigit sa ginadiling drugas,  giingong magsige usab kini og pasalba sa iyang armas diha sa 6.5 relocation site sa Barangay Paknaan ug si Montebon giingong nalambigit usab kini og kasong frustrated murder ug  murder ngadto sa lungsod sa Tuburan.

Gisubay usab sa kapolisan ang love triangle human masuta nga parehong minyo sila si Montebon ug Maribel Tikling. (Romeo T. Limpangog ug Rowena D. Capistrano/BDB)(BANAT NEWS)