Kapuyo gikasab-an sa inahan gisumbag, posteso nabuak

CEBU, Philippines – Arestado ang duha ka lalaki sa managlahing insidente sa paggamit og ilegal nga drugas ug pagdala og armas niadtong Lunes.

Si Ritchie Cabellon alyas Pepot, 34, molupyo sa Sitio Buli, Duljo Fatima, Siyudad sa Sugbo, nadakpan niadtong Lunes sa hapon sa Mambaling.

Giingong gisumbag sa suspek ang iyang inahan nga si Teresita Cabellon, 59, hinungdan nga nabuak ang posteso ug nag-amok human kasab-i ang iyang kapuyo tungod kay wala gibayad ang kwarta sa ilang utang.

Daling nitawag ang inahan sa kapolisan ug nasakmit gikan sa suspek ang drug paraphernalia sa iyang purol hinungdan nga siya gidakop.

Samtang si Renato Fernandez, 47, taga Sitio Lawis, Pasil, Siyudad sa Sugbo, nadakpan niadtong Lunes sa gabii sa L. Flores St. sa maong barangay.

Adunay nitawag sa kapolisan nga adunay lalaki nga nagdala og pusil sa maong dapit ug dali nga girespondehan sa kapolisan hinungdan nga nadakpan ang suspek.

Nagtingkagol sa prisohan ang suspek tungod sa kasong kalapasan sa election gun ban. (CNU Intern/GMR)(BANAT NEWS)