Unom ka barangay sa Tuburan apil sa EWAs
CEBU, Philippines – Unom ka barangay sa lungsod sa Tuburan ang gikompirma sa Cebu Provincial Police Office (CPPO) nga apil sa ilang pinal nga listahan alang sa rekomendasyon sa Election Watch List Areas (EWAs) sa umaabot nga eleksiyon.
Si Police Senior Superintendent Edgar Alan Okubo, direktor sa CPPO mitug-an nga ang unom ka barangay gilangkuban sa Putat, Carmelo, Mag-atubang, Sumon, Monte Alegre, ug Ga-ang.
Gibutyag ni Okubo nga ang unom ka barangay nipasar sa category 1 sa Comelec watch list diin aduna sila’y nakita nga intense political rivalry, election related violent incidents sa miaging piniliay, presensiya sa mga private armed groups (PAGs) ug mga rebelde.
Giklaro hinuon ni Okubo nga dili tibuok lungsod sa Tuburan ang ilang ideklara nga EWAs apan gipasalig niya nga hugot ang ilang ihatag nga siguridad.
Si Okubo mihangyo kini sa Police Regional Office (PRO)-7 nga hatagan sila og dugang 500 ka police personnel nga ma-augment atol sa eleksiyon.
Samtang ang Armed Forces of the Philippines ug ang Philippine Army nipasalig usab og igong pwersa aron masiguro ang kahapsay ug malinawon nga eleksiyon sa probinsiya sa Sugbo ilabi na sa Tuburan.
Nunot niini, gibutyag ni Okubo nga ang pipila ka barangay sa Medellin, Bogo, Daanbantayan ug Tabogon nga mahinumduman nga usa sa ilang gitun-an aron irekomenda sa EWA ilaha gihapon kining hatagan og saktong atensiyon sa siguridad. (/BDB)(BANAT NEWS)
- Latest
