Suspek sa pagpamusil nadakpan ug nakuhaan og mga armas
CEBU, Philippines — Nadakpan usab sa kapolisan ang suspek sa pagpatay sa usa ka lumolupyo sa Barangay Guizo, dakbayan sa Mandaue. Ang suspek nga si Roland Areta alyas Lico, nadakpan sa mga polis didto sa Sitio Pulang Bato, Barangay Talamban, dakbayan sa Sugbo kagahapon sa buntag.
Si Chief Inspector Aldrin Villacampa, hepe sa Presinto 1 sa Mandaue City Police Office (MCPO) miingon nga si Areta, taga Barangay Adlaon, dakbayan sa Sugbo. Si Areta maoy gitumbok nga mipusil ug mipatay ni Eric Manzo, 33, nga taga Barangay Guizo, Mandaue City.
Matud ni PO3 David Omambac nga ang dinakpan nga si Areta nasakmitan nila og kalibre 45 nga pistola, tulo ka magazine nga may bala, M14 nga armas ug mga magazine, ug mga bala sa KG-9 submachine gun, ug daghang bala.
Nasakmit pa gyud sa kapolisan gikan ni Areta mao ang bonnet, brown jacket ug backpack nga color gray. Gisusi karon sa kapolisan ang posibilidad nga si Areta usa ka hired killer. (BANAT NEWS)
- Latest
