Upat ka batan-ong ni-gang rape sa dalagita gipasakaan na og kaso

CEBU, Philippines — Pormal na nga napasakaan og kaso ang upat ka mga lalakeng gitudlo nga maoy responsable matud pa sa pag gang-rape sa 15-anyod nga dalagita sa Lungsod sa Oslob.  Ang maong dalagita namatay paglabay sa pipila ka adlaw.

Biyernes sa hapon nasang-at sa kapulisan sa Oslob Municipal Police Station ang kaso ngadto sa Cebu Provincial Prosecutor's Office.

Kasong statutory rape ang gipasakang kaso batok sa duha mag-igsupn ug duha nila ka barkada nga nagpuyo sa Lungsod sa Dalaguete.

Ang upat matod pa ang nag among-among sa 15-anyos nga dalagita niadtong December 10, 2024 sa alas 4 sa kaadlawon sulod sa bakanteng panimalay nga iya ra sab sa mga suspetsado.

Base sa giduso nga kaso adunay tulo ka testigo diin usa niini maguwang sa duha ka mga gipasakaan og kaso.

Una niini, ang mga suspetsado nasikop sa hiniusang operasyon sa Criminal Investigation and Detection Group Cebu City ug Provincial Field Unit ingon man sa Oslob Municipal Police Station niadtong Desyembre 19 sa gabii sa Barangay Casay, Dalaguete.

Ang upat positibong giila sa mga testigos ug nakita sab sila sa mga CCTV camera sa Lungsod sa Oslob.

Giklaro sa kapulisan sa Lungsod sa Oslob nga base sa nakuha nila nga mga ebidensya ug testigo upat ug dili 13 ka mga lalake ang matud pa naghimo sa krimen.

Padayon gihapon hinuon ang pagpalawom sa imbestigasyon sa Oslob Municipal Police kalabot sa maong kaso, ug sa mga nalambigit niini.

Samtang ang autopsy result sa biktima ang gipaabot nga mogawas na sa sunod semana. (BANAT NEWS)