Mga tunghaan gimanduan pag-update sa lscps

CEBU, Philippines — Gi-require sa Department of Education (DepEd) ang mga tunghaan sa paghimo ug pag-update sa ilang Learning and Service Continuity Plans (LSCPs) aron maseguro ang kaluwasan ug uninterrupted learning panahon sa kalamidad ug emerhensya.

Subay kini sa DepEd Order No. 022, s. 2024 nga naglatid sa bag-ong mga protocol alang sa pagsuspenso sa klase ug trabaho panahon sa bagyo, kusog nga pag-ulan, linog, pagkapalong sa kuryente, grabeng kainit, ubos nga kalidad sa hangin, ug uban pang peligro. Ubos sa DO 022, ang LSCP kinahanglang maglakip sa pag-ila sa Alternative Delivery Modes (ADMs) nga gipahaom sa lokal nga kondisyon, sama sa online distance learning, modular distance learning, o blended nga approach aron mahatagan ang mga estudyante og padayon nga access sa edukasyon panahon sa pagsuspenso sa face-to-face nga klase tungod sa mga kalamidad.

Dugang pa, ang LSCP nagmando sa mga eskwelahan sa pag-establisar og mga protocol alang sa pag-amping sa mga materyal sa pagkat-on ug mga himan gikan sa potensyal nga kadaot, ingon man alang sa ilang pag-apod-apod aron masiguro nga ang mga estudyante maka-access sa mga kapaninguhaan kung gikinahanglan.

Ang plano naglakip sa pag-mobilize sa mga magtutudlo, school heads, ug staffs sa panahon sa mga emerhensya, samtang nagpasiugda sa mga programa sa pagbansay-bansay ug mga capacity-building nga inisyatibo sama sa Learning Action Cells aron pagsangkap sa mga magtutudlo sa alternatibong mga pamaagi sa pagtudlo.

Gidasig usab sa DepEd ang pakigtambayayong sa mga local government units, mga ginikanan, ug mga organisasyon sa komunidad sa pagtipon sa mga kahinguhaan alang sa hapsay nga pagpatuman sa LSCPs.

Ang mga eskwelahan gimandoan usab sa paggahin og disaster preparedness ug recovery funding sa ilang School Improvement Plans, pagsiguro nga ang mga kapanguhaan anaa alang sa ADMs, make-up classes, ug uban pang may kalabutan nga mga paningkamot.

Ang LSCP kinahanglang maugmad matag tulo ka tuig kauban sa School Improvement Plan ug moagi sa tinuig nga pagrepaso ug pag-update sa pagsugod sa matag school year.  (BANAT NEWS)