3 bangko gipasanginlan sa mayor nga nanikas sa buhis
CEBU, Philippines - Mihatag og kamanduan si Cebu City Mayor Tomas Osmeña sa iyang mga ginsakpan nga dili i-proseso ang business permit renewal sa tulo ka dagkong kompaniya nga naa sa dakbayan sa Sugbo tungod kay kinahanglan nga adto sila moduso niini diha sa iyang buhatan.
Ang maong mga kompaniya tulo ka mga bangko, ang usa niini mao ang Banco De Oro (BDO) nga gipasakaan na niya og kaso. Samtang ang duha ka laing mga bangko nga dili pa mapangalanan sa Banat News hangtud di makahatag og habig, giingong konektado sa mga dagkong korporasyon nga nagbase dinhi sa Sugbo nga gidudahan sa mayor nga may isyu sa buhis.
Matud ni Osmeña naa sa iyang negative list ang maong mga kompanya ug siya mismo ang mohimo og imbestigasyon sa records niini.
“They are in my negative list, which means they are in my shit list. I’m doing this to protect the interest of the city,” matud sa mayor.
Nanghinaot si Osmeña nga tabangan siya ni Presidente Rodrigo Duterte sa iyang kawsa paggukod niining mga dagkong kompaniya nga matud pa niya wala magtarong sa pagbayad og buhis.
Una nang gipasakaan ni Osmeña og kaso ang BDO-Magallanes-Plaridel Branch tungod sa matud pa wala pagtug-an sa tinuod nila nga kinitaan aron matud pa dili makabayad og dakong buhis sa dakbayan. Nagpadala og show cause notice ang mayor sa kadagkuan sa maong kompaniya nga kinahanglan nilang tubagon sud sa lima ka adlaw sugod kagahapon.
Gusto sa mayor nga i-revoke ang ilang business permits tungod niini.
Ang Branch Manager sa BDO-Magallanes-Plaridel nga si Joseph Lao dihang gikuhaan og habig sa mga tigbalita wala mohatag og komento apan giduso na nila sa ilang legal department ang kaso nga gipasaka ni Osmeña batok nila. (BANAT NEWS)
- Latest
