Hamtong lalaki niambak sa bus namatay

CEBU, Philippines – Namatay ang usa ka lalaki kay maayong pagkapantok sa iyang ulo ngadto sa semento human siya niambak sa gisakyan niyang bus didto sa South Coastal Road nga sakop sa Barangay San Isidro, dakbayan sa Talisay kaniadtong Lunes sa gabii.

Ang namatay mao si Cesar Andales, 68-anyos, minyo nga taga Zone 4, Isla Verde, Barangay San Isidro, Talisay. Gitanggong karon ang drayber sa Sunrays Bus nga si Virgilio Agollo, 57-anyos, minyo nga taga Camburoy, Samboan.

Si traffic investigator Junard Jose Chiong nagkanayon nga pag-abot sa nahisgutang lugar, ang biktima misinggit nga siya manaog apan samtang nag-aginod pa ang bus, milukso si Andales ug nasarasay, dayon nalamba.

Matud sa traffic investigator nga gipahimangnoan pa gani unta ang biktima nga dili moambak sa nag-aginod pa nga sakyanan.

Ang polis miingon nga dili usab tinuod nga hubog ang biktima atol sa maong higayon kay ang iyang kabanayan mitug-an nga dili moinom og ilimnong makahubog si Andales.

Kagahapong adlawa, nagkita ang pamilya sa namatay ug ang kadagkoan sa kompaniya sa bus, apil ang drayber, ug gipanagsultihan nila ang posible nga pagsulbad nga malinawon sa kaso. – /RUB) (BANAT NEWS)