Local TV programs butangan og sign-language interpreter

CEBU, Philippines – Giaprobahan sa Konseho sa Dakbayan sa Sugbo ang ordinansa ang mandato sa tanang television stations sa siyudad sa paggahin og “tv inset” alang sa sign language interpreter sa matag pagpaawas sa mga news programs niini, lokal man o national.

Ang proposed ordinance nga giduso ni Konsehal Lea Japson nag-require sa mga television networks sa siyudad sa pagbutang og sign language interpreter sa mga news programs niini aron ang mga importanteng balita o pahibalo masabtan sa mga hearing-impaired o kadtong mga amang ug bungol.

Ubos sa Local Government Code, ang mga lokal nga pangagamhanan adunay kaakohan sa paghatag og social welfare services ug apil niini ang sa komunikasyon sa tanan.

Si Japson kinsa mao ang chairwoman sa Committee on Social Services miingon nga ang maong ordinansa suporta usab sa United Nations Convention for Rights of Persons with Disabilities nga giaprobahan sa Philippine Government niadtong April 2008. Sa lokal nga aspeto, ang siyudad nakakita nga may mga residente niini sa komunidad nga adunay “hearing disabilities.”

Base sa usa ka international convention,  kaupaton ang tsansa nga mamatay ang usa ka hearing impaired person itandi sa tawong wala’y kakulian  sa panglawas panahon nga adunay katalagman.

Kini tungod sa pagpasagad sa mga lokal nga pangagamhanan sa mga rehiyon   nga wala nila iapil sa ilang mga programa ug pagpangandam ang kahimtang sa mga tawong adunay mga kakulian sa panglawas. Usa sa nakita nga rason mao nga ang mga pahibalo alang sa publiko ipaagi man alang lang sa mga makabasa, makadungog ug makaestorya diha sa telebisyon.

Kini nga lakang tubag usab sa sentimiyento nga gipadangat sa mga organisasyon sa mga deaf community sa siyudad sa dihang adunay gipahigayon nga public hearing niadtong Nobiyembre 4, 2015.

Uban sa Philippine Accessible Deaf Services, Inc., sila mipadayag sa ilang suporta sa maong ordinansa ug misugyot sa daling pagpasar niini.

Kun kini mapasar, tawgon kini og "The Sign Language Ordinance" ug giulohan og "An ordinance requiring all TV stations airing in Cebu City to provide sign language in certain segments of their broadcast.” – /EIM) (BANAT NEWS)