Maglakaw og 6-kilometro atol sa IEC Youth Day 2016

CEBU, Philippines – Duha ka mga rota sa Dakbayan sa Mandaue ang gikonsiderar karon sa Commission on Youth nga ilang pilian alang sa ilang ipahigayon nga Jerico Walk nga manukad sa Hoopsdome sa Dakbayan sa Lapu-Lapu padulong sa Dakbayan sa Mandaue diin adto usab buhaton ang pipila ka mga kalihukan sa IEC Youth Day sa sunod tuig subay sa kalihukan sa International Eucharistic Congress nga mahitabo dinhi sa Sugbo.

Matud pa ni Edna Arellano, volunteer sa COY, nagpahigayon na sila og dry run niadtong Sabado sa hapon kauban sa tanang volunteers sa IEC Youth Day ug mga kaparian diin usa ka oras ug tunga kapin nilang gilakaw ang unom ka kilometro gikan sa Lapu-Lapu ngadto na sa Mandaue.

Sumala pa ni Arellano, nga nalangay sila pagsugod sa ilang dry run tungod sa ka traffic padulong sa Mandaue rason nga ilang napanglantawan nga molanat gyud ngadto sa duha ka oras kapin ang Jerico Walk atol sa aktwal na unya niining kalihukan. Ang Jerico Walk ipahigayon Enero 28, 2016 nga tambongan sa dili mominos singko mil ka mga delegado gikan sa tibuok kalibutan.

Gibutyag ni Arellano, magtagbo sila pagbalik sa tanang komitiba sa IEC Youth Day kauban ang mga nagkadaiyang ahensya ilabi na sa Dakbayan sa Lapu-Lapu ug Mandaue aron makahimo og mga kausaban kun gikinahanglan. – /EIM) (BANAT NEWS)