Mga magtutudlo sa Bulacao gi-drug test
CEBU, Philippines – Gipakalitan og drug test ang 70 ka magtutudlo sa Bulacao Elementary School sa dakbayan sa Sugbo kagahapon sa mga sakop sa Cebu City Office on Substance Abuse Prevention (COSAP).
Matud ni COSAP chief, Dr. Alice Utlang, nga tuyo sa ila’ng kalihukan ang pag-seminar sa mga magtutudlo sa epekto sa drugas ug pagkahuman gipahigayon gilayon ang surprise drug test.
Sumala pa ni Utlang nga wala’y mga magtutudlo ang niangkon nga tiggamitan og drugas.
Sa 70 ka magtutudlo, tulo lang ang lalaki ug karong adlawa gikatakda nga moguwa ang resulta.
Ang Bulacao Elementary School ang ikalima nga eskwelahan nga gipaubos sa drug test pero bugtong ang Talamban National High School pa ang nadeklarar nga drug-free workplace tungod kay ang uban nga eskwelahan, bisan og negatibo ang ila’ng resulta, apan dili tanan magtutudlo ang napaubos sa drug test tungod kay aduna may nagkadaiyang kalihukan nga gitambongan ang uban. – /GMR) (BANAT NEWS)
- Latest
