Duha ka lalaki gipatay, usa nakuhaan og credit card sa biktima sa ‘joy riders’

CEBU, Philippines - Tulo ka pagpamusil ang nahitabo sa managlahing lugar dinhi sa Sugbo diin duha ang patay, usa kanila giingong nakuhaan og credit card nga gipanag-iya sa usa sa mga biktima sa “joy riders” sa miaging semana.

Ang credit card nga gipanag-iya sa higala ni Mayor Michael Rama nga si  Eleanor Rivera kinsa gipusil sa usa sa tulo ka mga lalaking nangarnap ug mikuha sa iyang kwarta ug bag, narekober gikan sa patay’ng lawas ni Teodorico Tolentino Jr., 47, taga Salvador Extension, Labangon ning dakbayan kinsa napalgan sa miaging gabii diha sa Sitio Cogon, sa samang barangay.

Dugang gipatay sa miaging gabii mao si Romeo Ysulan, 20, nga nahitabo diha sa Holy Name, Barangay Mabolo.

Sa imbestigasyon sa Homicide Section sa Cebu City Police Office gitug-an ni SPO4 Rey Cuyos nga miabot sa crime scene si Tolentino ug nakigtagbo sa usa ka Charles Dela Cruz.

Apan tulo ka mga tawo ang kalit miduol kanila ug nabantayan ni Dela Cruz nga usa sa mga lalaki mikuha og pusil sa iyang sling bag dayong pusil kanila. Si Dela Cruz nakadagan apan ang usa ka bala miigo sa ulo ni Tolentino, namatay siya sa Cebu City Medical Center.

Sa pagsusi sa mga gamit ni Tolentino, nakuha ang nagkadaiyang mga ID’s ug usa niini ang credit card nga gipanag- iya ni Eleanor Rivera.

Ang kapulisan sa homicide dali gilayon nga nakig- alayon sa Theft and Robbery Section (TRS) aron ilang makompirma kung usa ba si Tolentino sa mga suspek sa insidente niadtong Mayo 26 sa bukirong bahin sa siyudad.

Si Superintendent Romeo Santander, ang hepe sa City Intelligence Branch nagduda nga way apil si Tolentino sa maong pagpanulis tungod kay duna silay impormasyong nadawat kun si kinsa ang nipusil sa biktima nga ilaha pang gisubay karon.

Ang laing biktima sa pagpamusil nga si Ysulan, giingong nagbarog sa Holy Name, sa Mabolo dihang kalit lang usa ka motorsiklo nga dunay sakay nga duha ka lalaki ang kalit lang mipusil kaniya ug maayong pagkaigo sa iyang ulo ug likod. Namatay kini pag-abot sa CCMC.Nakuha sa kapulisan   sa crime scene ang unom ka basiyo sa .45 caliber pistol ug usa ka deformed slug. (/EIM)(BANAT NEWS)