MCWD daghang reserbang tubig bisan mag El Niño

CEBU, Philippines - Mipasalig ang Metropolitan Cebu Water District (MCWD) nga dunay paigo nga supply sa tubig kun mahitabo ang El Niño nga gibanabana sa Philippine Atmospheric, Geophysical and Astronomical Services Administration (PAGASA) nga maabot karong Hunyo.

Apan mitug-an si MCWD Assistant General Manager for Operations Ernie Delco nga delikado kini kun mahitabo ang El Niño, dili lang ang siyudad ang maapektuhan, kun dili tibuok nasud.

Saysay ni Delco nga adunay gipaabot nga 18, 000 cubic meter nga supply gikan sa Cebu Manila Water Development Incorporated nga moabot karong Hulyo gikan kini sa lungsod sa Carmen nga ipaagi sa tubo.  Aduna usab 5, 000 cubic meter nga supply gikan sa Pit-os well nga moabot karong Hunyo, ug duna pay laing supply nga reserba ang MCWD aron dili mahutdan ang siyudad og tubig.

Matud ni Delco, bisan og kuwang ang ilang produksyon sa tubig karon itandi sa ilang kinahanglan malipayon sila tungod wala sila makadawat og mga reklamo gikan sa mga konsumidor.

“What I’m actually looking at is the complaints of the customer, kay even if magkulang o gamay ang atong production, if the customers are happy, no problem,” sigon niya.

Dugang ni Delco nga aduna pay natural nga reserba ang MCWD sa Jaclupan Talisay, nga adunay tres milyones cubic meters nga tubig nga gituohang magamit sud sa tulo ka buwan sa siyudad kun wala’y uwan.

Mipasalig siya nga kun maabot ang El Niño, aduna na sila’y daghang reserba ug kun mag-abot na kining tanan, dili maapektuhan ang mga konsumidor. (/EIM)(BANAT NEWS)