Halin sa mga tiggama og silhig nga buli wa mokibra

CEBU, Philippines -  Wala maapektohi ang production sa pagpanggama og silhig nga lanot sa buli sa barangay Paknaan, dakbayan sa Mandaue   luyo  sa mitumaw  nga   modernong  kahimanan sa pagpanglimpiyo sa hawanan ug lawak sa balay  o mga buhatan nga pribado  ug  sa  kagamhanan.

Kini ang gipadayag ni Paknaan, barangay Kapitan Malaquias Soco nga nahinabi sa Banat News   sa miaging adlaw kinsa miingon nga ang ilang produkto nga silhig nga lanot wala gayud mokibra ang halin sukad pa kaniadto hangtod karon.

Kini nagkahulogan matud  pa   nga  wala  kini  apektohi  sa  mga moderno nga kahimanan sa pagpanglimpiyo nga mosuyop sa mga sagbot ug abog. Gipasabot niya nga bisan sa nasinati nga dagkong katalagman nga naglakip sa 7.2 magnitude nga linog niadtong Oktubre 15 ug Super Typhoon Yolanda sa Nobyimbre 8 sa miaging tuig wala gihapon kini matandog.

Matud pa ni Kapitan Soco nga nagtuo gayud sila nga maapektohan ang  ilang  produksyon   human sa bagyong  Yolanda.

Apan  karon nasuta  nila  nga  nagpadayon  silang  nakatagamtam  sa maayong  lakaw  sa panginabuhi  nga  nagpadayon  pa sa pagpatungha  sa ilang  mga anak   sa mga  dagkong  kolehiyo ug unibersidad.

Dugang pa niya nga nagtuo sila nga maglisod na sila sa pagkuha og materyales nga ilang gamiton sa pagpanggama og silhig nga lanot sa buli sanglit sagad gikan man sa maong dapit ang ilang mga supplier niini.

Naglakip sa mga dapit nga nag-supply kanila og lanot sa buli ug ingon man ang gunitanan nga kawayan gikan man sa lungsod sa Sogod ug silingan pa nga mga lungsod lakip  na sa isla sa Bantayan.

Si Kapitan Soco miingon nga ang kalamboan sa pagpanggama og silhig sa ilang dapit maoy  nakaaghat  kanila sa pagmugna   sa tinuig  nga  Silhig Festival .

Dugang pa niya nga karong Pebrero 2 niining tuiga maoy mag-atbang sa pagsayaw sa Silhig Festival  ang pito ka mga contingent   alang sa fiesta nga ilang  saulogon  sa Pebrero 9 niining tuiga. (BANAT NEWS)