Nadelatar nga court hearings maoy nakaingon nga nagdasok ang priso

CEBU, Philippines - Gikinahanglang ibanan ang mga piniriso sa Cebu City Jail male dormitory matud pa ni Bise Mayor Edgardo Labella tungod sa kahuot na niini.

Matud ni Labella, adunay 2, 404 nga lalaking piniriso ang Cebu City Jail.

“The maximum accommodation should have been only, a thousand. So there’s like a surplus of more than a thousand,” ang bise mayor nagkanayon.

Base sa standard sa United Nations ang usa ka square meter nga hawan igo lang sa usa ka piniriso.

Matud ni Labella, nahitabo kini tungod sa mga pinirisong kuwang og legal nga tabang gikan sa mga abogado ug dunay uban nga nilapas na ang sintensya.

“Especially during the earthquake, many have not been arraigned and are there for quiet a long time already. So, it should be decongested,” dugang niya.

Kahinumduman nga adunay mga trial courts nga naguba tungod sa linog nga niigo sa Sugbo niadtong Oktubre sa niaging tuig hinungdan nga nahunong ang proseso sa mga kaso.

Molapas usa ka buwan pa una nabalik ang mga court hearings diin gihimo kini pinaagi sa mga tents gawas sa trial courts.

Matud ni Labella kinahanglang matagaan og kahigayonan ang mga piniriso nga makabalik sa ilang kinabuhi gawas sa prisohan.  (BANAT NEWS)