Bogo wa na magpaabot sa mga hinabang sa national government
CEBU, Philippines - Padayon na ang pagpang apod-apod sa dakbayan sa Sugbo sa mga gamit sa pagpatukod og balay ingon man panginabuhian samtang ang grupo sa nasudnong kagamhanan nga mohimo sa evaluation sa danyos sa bagyong Yolanda, nangabot na sa amihanang bahin sa lalawigan sa Sugbo.
Si Bogo City Mayor Celestino Martinez Jr. ug kaubanang mga opisyal ang nangulo sa pagpang apod-apod sa mga sin, lansang, pagkaon ug baktin nga ipabuhi hangtud mabaligya sa mga apektadong pamilya sa dihang niabot ang Post-Disaster Needs Assessment (PDNA) Team kagahapon.
Matud pang City treasurer Julio Ursonal nga ang syudad nigasto og P5.2 milyones sa pagpamalit sa 18 mil ka palid nga sin ug 4,000 kilos nga lansang alang sa atop sa balay.
Ang syudad nigasto usab og P2.1 milyones alang sa 200 ka baktin ug 300 ka sakong lawog diin ang matag pamilya hatagan og tag duha ka baktin ug tulo ka sakong lawog.
Matud pang Ursonal nga bawion sa syudad ang puhunan balor og P2 mil matag pamilya aron ihatag na usab kini ngadto sa laing pamilya.
Gipasabot hinuon ni Martinez nga dili tanang pamilya madungan sa paghatag gumikan sa kanihit sa suplay sa baktin lakip na sa mga gamit sa pagpatukod pagbalik sa mga nangagubang balay.
Ang syudad nilusad sa Adopt-A-Barangay Project aron pagtubag sa problema sa pagpabangon pagbalik sa nangaguba sa bagyo. “Kung mag-agad ta sa national government, dugay pa kaayo,†matud pa ni Martinez. (BANAT NEWS)
- Latest
