Nangaguba nga eskuylahan sa Bogo gi-repair na sa IDF

CEBU, Philippines - Gipang-ayo sa mga Israeli Defense Force ang mga nangagusbat nga mga tunghaan sa Bogo City, diin usab ilang gitukod ang usa ka    fully-equip tent hospital sa maong siyudad.

Ang mga miyembro sa IDF, namanday sa Bogo Central School II ug sa Siocon Elementary School sa maong dapit. Si Nevida Abellana, ang principal sa BCS II dako ang pasalamat sa gihimo sa mga Israeli sa ilang eskuylahan.

Gisugat ug niwagayway sa banderitas ang mga estudyante sa  mga  senior military generals sa dihang nibisita sila sa maong tunghaan.

Ang mga opisyal sa IDF nalingaw sa mga pasundayag nga gi-andam sa mga estudyante nga nag-ukelele ug gikantahan ang mga bisita.

Nagpasalamat usab si Abellana nga gihatagan sila og generator. Kinse ka mga classrooms nga nangangusbat ang giayo sa maong mga langyaw sa maong tunghaan ug padayon pa silang mamanday sa ubang tunghaan.

Gi-ayo usab nila ang lima ka classrooms nga nangaguba sa Siocon Elementary School diin gamit ang kaugalingon nilang mga ekipo.

Samtang nagbutang usab sila og mga water purifier system sa maong lungsod aron makainom ang katawahan og limpyong tubig samtang wala pa naayo ang linya sa kuryente sa maong dapit. (BANAT NEWS)