Negosyante nanghatag sa iyang mga petrolyo

CEBU, Philippines - Usa ka negosyante nga biktima usab sa bagyong Yolanda ang nanghatag og mga petrolyo ngadto sa iyang mga kababayan sa Tacloban City bisan alkanse na siya sa iyang negosyo.

Ang nanghatag sa iyang mga produktong petrolyo mao si Jimmy Yaokasin, kinsa adunay lima ka mga Star Oil gasoline stations sa Tacloban City mihatag sa nahibiling stocks sa iyang gasolinahan ngadto sa mga biktima.

Matud pa niya nga responsibilidad sa tagsatagsa kanato ang pagtabang ug sa maong paagi makatabang na siya nga mamenusan ang kalisod nga giagian sa iyang mga kababayan.

Sa miaging semana,  dunay mga gasolinahan nga gipanglungkab ug gipanghakot ang mga petrolyo niini sa mga tawo. Ang gipanguhang petrolyo gigamit alang sa mga motorsiklo ug sakyanan samtang ang uban aron pangsuga ug pangluto.

Matud niya nga mentras duna pay sud ang mga tanke sa iyang mga gasolinahan iyaha kining ihurot og panghatag hangtud kun kanus-a dunay makasulod nga magsuplay niini.(Gikan sa Wires/EIM)(BANAT NEWS)