Atol sa paglatos ni Yolanda duha ka oras ibabaw sa manggaalang sa anak

Mga hulagway kuha ni Joy Torrejos

CEBU, Philippines - Kakusog sa hangin ug grabeng pagsaka sa tubig dagat nga miabot sa napulo ka tiil ang gilawmon maoy pipila lang sa giagiang kalisod sa 37-anyos nga si Lilian Patron samtang nagkugos sa iyang usa pa ka tuig nga anak.

Lumad nga taga Palo, Leyte si Lilian ug dunay tulo ka mga anak nga lalaki.

Niasiya karon dinhi sa Sugbo aron pagpaalim sa iyang usa ka anak nga nasakit gumikan sa pagkuso-kuso sa bagyong Yolanda sa ilang dapit.

“Okay na po yung anak ko, salamat sa lahat na tumulong,” matud pa niya nga daw naibtan og tunok taliwala sa pait nga kasinatian.

Ang iyang bana nagpabilin karon didto sa Leyte gumikan kay mao kini ang nagbantay sa duha nila ka mga anak.

Dili lalim ang iyang giagian sa dihang nasugatan nila ang maong kalamidad gumikan kay kapin sa duha ka oras siya nga nigakos sa dakong sanga sa punoan sa mangga samtang nagkusokuso ang bagyo.

Bisan ang simpleng pagkugos sa iyang anak nga masuso lisod kaniya niadtong mga tungora tungod kay kinahanglan niyang di mabuwag sa sanga.

“Malalim na po ang tubig, hindi ko na alam kung ano ang gagawin ko. Siniguro ko talaga na hindi ko mabitawan yung bata. Masakit na yung kamay ko, pero hindi ako nag-give up dahil ayaw ko mawala yung anak ko,”naghilak nga gisaysay ni Lilian sa Banat News.

Mapasalamaton si Lilian gumikan kay samtang nagkupot siya sa punoan sa mangga sa kapin sa duha ka oras, na-rescue siya sa iyang igsuon nga lalaki ug mitabang og agak sa iyang anak.

Human milurang ang bagyo ug nakita nila ang makapanglimbawot balahibo nga talan-awon ug wala nila kapugngi ang pagtulo sa ilang mga luha gumikan kay nagkatag na sa dalan ang mga patay nga lawas sa iyang mga silingan.

Nag-istar karon si Lilian uban sa iyang usa niya ka anak sa evacuation center diha sa bag-ong Barangay Tinago Sports Complex.

Matag gabii, gasige na lang siya og hilak gumikan kay gimingaw na siya pag-ayo sa duha niya ka mga anak nga nagpabilin karon didto sa Leyte nga walay kasigurohan kung nakakaon ba o bisan nakainom lang og limpyo nga tubig.

“Malaki kasi ang problema dun, walang pagkain at tubig. Araw-araw iniisip ko sila kung ano na kaya ang sitwasyon nila doon,”matud pa ni Lilian.

Sumala pa niya human mahumod sila og dugay sa tubig nasakit ang iyang anak maong nakadesider siyang dad-on sa tambalanan ang iyang anak bisan wala sila’y payong o bisan unsang uga nga butang nga matabon sa iyang anak.

Way kaon ug way tubig ug nagsige pa og bunok ang uwan, gilakaw ni Lilian og tunga sa adlaw ang karsada gikan sa Palo padung sa Tacloban City nga nangaalihan na og mga debris, poste, kable, mga patay’ng lawas ug mga tawong daw way direksyon ang paglakaw.

Diha lang niya nasayran nga walanay hospital sa siyudad kay nabanlas usab kini.

Suwerte nga dunay nakasulti kaniya nga dunay mga C-130 sa Philippine Air Force nga naghatud og mga relief goods ug mga sundalo nga nagpasakay og mga sibilyan nga nagkasakit ug mga nangaangol maong midesider siyang dad-on ang anak sa Cebu.

Kapin usab sa tulo ka oras siya nga nakigpunsisok sa liboan ka mga tawo sa airport nga gusto nang makaikyas sa Tacloban City aron makasakay sa C-130 padung sa Cebu.

“Pinalakas ko yung loob ko, alang-alang sa aking pamilya,”matud pa ni Lilian.

Nangindahay siya karon nga mabalik na sa normal ang tanan ug matabangan niya ang iyang pamilya didto sa ilang lugar. (BANAT NEWS)