Abangan sa mga vendor sa merkado sa Mandaue suspensohon

CEBU, Philippines - Gihatagan  ang  mga vendor og  moratorium sa pagbayad sa ilang  mga abangan sa  merkado publiko sa dakbayan sa Mandaue samtang  gisuta  pa kun  makabalik ba  sila  og  paninda.

Kini  samtang gitak-opan pa ang edipisyo sa merkado  kay gisusi  pa ang kadaut sa linog niadtong Oktubre 15 niining tuiga.

Si Konsehal Jimmy Lumapas nga maoy chairman sa committee on market sa konseho sa dakbayan  sa Mandaue maoy nangamahan sa ordinansa  kalabot  niini.

Kun  kaaprobahan ang maong  ordinansa, ang mga manindahay  kahatagan usab og 46 ka adlaw nga dili kolektahan sa ilang mga abangan. Gitataw ni Lumapas nga samtang gipaabot pa nila nga kaaprobahan ang gipangamahanan niyang ordinansa, magpadayon pa ang kagamhanan sa pagkolekta sa ilang abangan.

Gipasabot ni Lumapas nga sa higayon  nga kaaprobahan ang iyang ordinansa  kadtong nakolekta nga abangan sa nahisgotang mga manindahay, magsilbi na lang nga  ilang advance  nga abang.

Sa iyang gipangamahanang ordinansa si Lumapas mipasabot nga hatagan  una og higayon ang mga vendor nga dili  una mohatag og abang sa giukopar   nila nga  stall samtang gipaabot pa ang assessment sa mga structural engineer bahin sa kalig-on sa building  sa merkado. Hinuon  kun  masuta  na  nga  makabalik na  sila sa  pagpaninda, anha  na  sila  sugdi  sa pagpangolekta  og  abang, sumala  pa  ni Lumapas. (/WC) (BANAT NEWS)