DSWD miumol og bag-ong sistema sa pagpanghatag og hinabang

CEBU, Philippines - Giumol  sa  Department of Social  Welfare Development sa Central Visayas (DSWD-7) ang bag-ong pamaagi sa pagpanghatag og hinabang nga pagkaon ngadto sa 17 ka apektadong lungsod sa lalawigan sa Bohol aron  mahatagan  gayud  ang  matag  pamilyang  nabiktima  sa linog.

Matud pa ni Kerwin Macopia, usa sa mga tigpamaba sa DSWD-7 nga ang ilang buhatan nakig-alayon sa provincial government sa Bohol, Australian Aid (AusAid) ug usab World Food Programme (WFP) alang sa giingong bag-ong pamaagi sa distribusyon.

Si DSWD Secretary Corazon Juliano Soliman miingon nga nagtakda sila og klarong criteria sa pag-ila sa mga lungsod nga ilang gihatagan og dakong prayoridad nga makadawat og pinutos nga mga pagkaon.

Gipadayag ni Macopia nga ang 17 ka mga lungsod sa probinsya sa Bohol gigradohan base sa insidente sa kalisod, gidaghanon sa mga nagusbat nga mga balay ug usab gidaghanon sa mga nawad-an og pinuy-anan.

Gisaysay usab ni Macopia nga sugod niadtong Nobiyembre 1 ning tuiga hangtod kagahapon, ang mga trabahante sa DSWD nang-apud-apod og 59,703 ka mga pinutos nga pagkaon ngadto sa mga apektadong dapit.

Dugang pa ni Macopia nga ang maong hinabang nga gipanghatag atol sa hataas nga bakasyon naglangkob sa 20 ka kilo nga humay, 10 ka de latang sardinas, 10 ka pakete nga kape, ug 10 ka pakete nga chocolate drink diin ang matag pakete konsumohon sulod sa duha ka semana.

Gibutyag ni Macopia nga base sa ilang plano, dugang tulo na usab ka round sa pagpanghatag og relief goods ang ipahigayon sa umaabot nga Nobiyembre 16 hangtod Nobiyembre 18 , Disyembre 1 hangtod Disyembre 3, ug usab Disyembre 16 hangtod Disyembre 17 ning tuiga.

Si Macopia nagkanayon nga niining maong mga petsa  ang ilang  ipanghatag nga pagkaon maglangkob sa 20 ka kilo nga humay, unom ka de latang sardinas, lima ka de latang beef loaf, lima ka de latang corned beef, lima ka de latang pork and beans, lima ka de latang sausage ug napulo ka paketeng kape.

Gisaysay ni Soliman nga ang maong pagpanghatag og mga pagkaon magpadayon hangtod ang mga apektadong pamilya andam na nga makaabot sa pagpalit sa ilang batakang panginahanglan. (/WC) (BANAT NEWS)