Natanggong tungod sa baha ang bukirong brgy. sa Talisay

CEBU, Philippines - Mikabat ngadto sa usa ka  oras ang pagkatanggong sa mga residente ngadto sa bukirang barangay sa dakbayan sa Talisay human nga ang  baha sa sapa diha sa sitio Tangub, barangay Lagtang miawas sa spillway niadtong Miyerkules sa gabii.

Ang maong spillway nga temporaryong agianan sa mga residente sa bukirang barangay sa siyudad hinimo kini sa QM Builder nga contractor sa gipahigayong road widening diha sa lugar.

Si Talisay City Public Information Officer Vincie Monterde mibutyag kini nga mga alas 6:45 sa gabii niadtong Miyerkules nadawat nila ang maong report hinungdan nga uban ni Talisay City Councilor Danny Caballero misusi sila ngadto sa lugar.

Matud ni Monterde nga sobra sa 100 ka mga residente sa bukirang barangay kinsa mopaingon sa ubos ug  mopaingong mopauli ang natanggong tungod sa baha.

Ang mga tinugyanan sa QM Builder ang mipugong sa mga tawo sa pagtabok diha sa spillway dihang misaka na ang tubig aron malikayan ang disgrasya tungod kay delikado silang maanod sa kakusog sa sulog sa baha. Matud ni  Monterde nga ang QM Builder migamit sa ilang back hoe sa pagkubkub diha sa sapa aron makuha ang mga gapnod nga maoy nakasalimbong sa agianan sa tubig nga maoy hinungdan sa pag-awas sa tubig.

Si Caballero mihangyo sa QM Builder nga pabutangan og suga diha sa lugar tungod kay nabantayan nila kining ngit-ngit kaayo ug delikadong dili mabantayan sa moagi ang pagsaka sa baha ug dilikado usab nga dunay mahagbong ngadto sa sapa gikan sa ibabaw sa spillway.

Kahinumduman nga ang kagamhanan sa siyudad mihatag kutob karong kataposan niining buwan sa QM Builder sa pagtapos sa mao nilang proyekto diha sa lugar aron maagian na sa pagbalik ang karsada ug mahunong na usab ang problema sa mga residente sa lugar kabahin sa abog ug lapok.  (BANAT NEWS)