Drug den sa sogod gironda, paryente ni comendador sikop
CEBU, Philippines - Nagkadaiyang klase sa armas ug ubay-ubay nga pakete sa shabu nga mobalor sa P20,000 ang nakuha sa operatiba sa Provincial Intelligence Branch (PIB) sa gipahigayon nga buy-bust operation adtong miaging gabii sa Sitio San Isidro, Barangay Poblacion, Sogod.
Ang operatiba misikop sa pito ka mga suspek lakip na ang paryente ni Cebu Provincial Police Office Director, Sr. Supt. Patrocinio Comendador, kinsa nag-pot session adtong tungora sa sulod sa balay sa subject sa mao nga operasyon nga si Rodel Armilla, 32, ug pag-umangkon niining si Niño James Armilla, 25.
Ang nag-pot session nga nasikop mao sila si Nazareno Pricillas, 22, kinsa paryente ni Comendador; Jay Christian Ramos, 32; ug El June Enriquez, 31, nga mulopyo sa maong lugar. Si Sergio Delos Santos, 31 ug Adam Caballes, 36, pulos taga dakbayan sa Danao.
Nakuha sa operatiba ang 31 ka gagmay ug usa ka dakong pakete sa shabu, nagkalain-laing drug paraphernalia, usa ka .38 revolver nga adunay lima ka bala, .22 magnum revolver nga adunay unom ka bala, .9mm KG9 submachine pistol nga adunay duha ka magazine ug 15 ka bala, suppressor, cellphone, notebook nga listahan sa utang sa shabu, ug wig.
Atua na sa Philippine National Police Crime Laboratory-7 sa Camp Sotero Cabahug, Cebu City ang maong mga ebidensiya alang sa chemical analysis ug ballistics examination.
Si SPO1 Francis Alen Villamor maoy nangulo sa operasyon human sa pipila ka sumbong nga ilang nadawat batok kang Rodel ug Niño James.
Si Comendador mibutyag nga si Rodel ug Niño James mga core members sa ilang grupo. “I know these guys and ako mismo ang nag-recruit og informants for the operation,†matud ni Comendador.
Sa lahing interview, si Rodel mi-deny sa maong mga alegasyon. Si Pricillas usab mibutyag nga nagkaon lang sila adtong higayuna dihang gisikop sila.(Ria Mae Booc/EIM) (BANAT NEWS)
- Latest
