Giselosan sa hilaw nga bayaw, gipatay

CEBU, Philippines — Patay sa pagpanunggab ang usa ka 28-anyos human kini giselosan sa kaipon sa igsuon sa iyahang kaipon sa Sitio Hillside, Barangay Talamban, siyudad sa Sugbo pasado alas 4 sa akadlawon kagahapon, Lunes, Nobiyembre 4, 2024.

Ang biktima mao si Denmark Clarin Inocando, 28, dunay kaipon samtang ang suspek mao si Vincent Valdez alyas Bentot. Ang suspek ug biktima nagpuyo ra sa usa ka balay sa naasoy nga dapit.

Matud pa sa Talamban Police Station 8 sa Cebu City Police Office(CCPO) pag-abot nila sa dapit naghigda na ang biktima , wala na maglihok ug nakaangkon og samad-dinunggaban sa tuo nga dughan.

Gidala pa ang biktima sa Cebu City Medical Center apan gideklarar nga dead-on-arrival. Base sa imbestigasyon sa kapulisan ang kaipon sa biktima nga si Maria Monica Quijano, nakurat nalang siya nga nidagan pasud sa ilaha ang biktima nga nagkadugo alas- 4 sa kaadlawon kagahapon.

Matud pa nagsapupo na kini sa iyang tuo nga dughan ug nangayo og tabang.  Kini mitug-an nga gidunggab siya ni Valdez samtang siya naglakaw sa gamay ug ngitngit nga dalan sa dapit.

Ang kaipon sa biktima mitug-an nga gidunggab nangabubho ang suspek kay nakit-an niya nga ang iyahang kaipon nga igsuon ni Maria nakig-inom sa biktima.

Sa pagkutlo ning maong balita wala pa nadakpan ang suspek nga nisibat dayon human sa krimen.

Sa laing krimen, samdan ang duha ka mga lalake human sila gitigbas sa ilang kainom sa Sitio  Hag-it, Barangay Biga, dakbayan sa Toledo sa miaging adlaw.

Ang mga biktima mao sila si alyas Senio, 66 anyos ug si alyas Mario, 35 anyos samtang ang suspek mao si alyas Dito, 55 anyos nga managsilingan ra sa maong dapit.

Sa imbestigasyon sa Toledo City Police Station, base sa gibutyag sa nakasaksi sa hitabo nga nag-inom ra ang tulo sa panimalay ilang kaila nga si alyas Vestre, apan dihang nangahubog na gihatod na sila niini sa gawas.

Samtang naa sa gawas naglalis matud pa ang tulo gumikan sa kahubog.  Ang suspek niuli sa ilang panimalay ug nikuha og sundang dayon mibalik kini ug gitigbas ang duha.

Si Senio nakaangkon og samad tinigbasan sa ulo, bukton ug tiyan. Samtang si Mario nisuway og uwang sa duha apan gitigbas sab siya sa suspetsado maong nakaangkon sab kini og samad tinigbasan sa nagkadaiyang parte sa lawas.

Daling miikyas ang suspetsado samtang ang mga biktima gidala sa Toledo City Hospital.  Na- recover sa kapulisan ang sundang nga gigamit sa suspek sa pagpanigbas.

Nadakpan dayon sa hot pursuit operation sa kapulisan ang suspek sa pinuy-anan niini sa Barangay Biga. Gikatakda nga pasakaan og tukmang kaso ang suspetsado. (BANAT NEWS)