Mga lugar gikusokusog sa Kristine ug Leon maapektahan balik sa Bagyong Marce

CEBU, Philippines — Ang tropical depression nga gimonitor sa Philippine Atmospheric, Geophysical, and Astronomical Services Administration (PAGASA) nahimo nang usa ka tropical storm dihang nisulod kini sa Philippine Area of Responsibility (PAR) alas 2 kagahapon sa kaadlawon niadtong Lunes, Nobiyembre 4.

Matud sa PAGASA ang Tropical Storm "Marce" nga adunay internasyonal nga ngalan nga Yinxing, nagkakusog samtang kini naglihok sa amihanan-kasadpan sa Philippine Sea, nga nag-aghat sa mga kabalaka alang sa kusog nga pag-ulan ug kusog nga hangin sa Northern Luzon.

Base sa weather update sa alas-5 sa hapon kagahapon, si Marce anaa sa gibana-bana nga 740 km silangan sa Virac, Catanduanes, dala ang kusog nga hangin nga 85 km/h ug paghuros nga moabot sa 105 km/h. Ang bagyo gilauman nga anam-anam nga mokusog ug moabot sa typhon status karong gabii.

Ang kusog nga pag-ulan gipaabot sa Extreme Northern Luzon ug sa eastern sections sugod gahapon o karong adlawa, Martes, uban ang Tropical Cyclone Wind Signal No. 1 nga posibleng i-isyu alang sa mga bahin sa Cagayan. Gipaabot usab ang Gale Warning alang sa mga kabaybayonan sa Northern Luzon.

Gituohan nga posibleng mo-landfall  kini sa pipila ka bahin sa Cagayan karong Miyerkules o Huwebes o ba kaha motapsing lang sa Northern Luzon.

Gitambagan sa PAGASA ang mga marinero nga likayan ang paglawig sa kadagatan, ilabina ang gagmay nga mga barko, tungod sa posibleng pagtaas sa balud ngadto sa 3.5 metros sa rehiyon sa Batanes ug 3.0 metros sa bahin sa Cagayan ug Isabela.

Ang bagyo gipaabot nga mo-landfall duol sa Babuyan Islands o amihanang bahin sa Cagayan sa Huwebes sa gabii o Biyernes sa buntag.

Samtang gipahimangnoan sa state weather bureau PAGASA ang mga residente sa Northern Luzon batok sa kusog nga ulan, kusog nga hangin, ug storm surge nga mahimong dala sa Tropical Storm Marce.

Giawhag usab ang mga residente nga anaa sa mga lugar nga huyang nga sundon ang mga pasidaan sa lokal nga awtoridad ug maghimo sa gikinahanglan nga mga pag-andam. (BANAT NEWS)