P22 mil natulis gikan sa mga negosyante

CEBU, Philippines - Mikabat  og  P22,000  ang  salapi nga  nasakiyo  sa mga  tulisan  gikan   sa  magtiayong negosyante og baboy   kinsa  gitulis sa atubangan sa ilang balay sa sitio Sampaguita I, barangay Lamac, lungsod sa Consolacion   sa  miaging  hapon.

Ang   mga  biktima mao sila si Florefes Abdon, 51 ug Francisco Abdon, 51 nga nagpuyo sa maong dapit .

Ang   mga  tulisan  duha  ka  wala  hiilhing  mga lalaki   nga nagsakay og motorsiklo ug nagsul-ob og close type nga helmet. Si PO1 Archival  Caputolan sa kapolisan sa maong lungsod nga nahinabi sa Banat News miingon nga gimaneho sa bana ang multicab nga ilang giluwanan gikan sa ilang tindahan sa  karne sa merkado sa dakbayan sa Mandaue.

Dugang pa ni PO1 Caputolan nga dihang nahiabot  na sila sa ilang  balay, nanaug  ang asawa  aron  sa pag-abli  sa ilang  gate. Matud pa ni PO1 Caputolan nga sa pagkanaug sa asawa kalit   nga  miabot  ang  usa ka  motorsiklo  nga  gisakyan  sa   duha ka lalaki dayon  pulos  sila  gitionan    sa  mga  armas  niini.

Dayon  gipangayo  ang  bag  nga  gisudlan  sa kuwarta    gikan  sa asawa.

Ang asawa nga gibati og hilabihang kahadlok mitunol  dayon  sa  iyang  bag  ngadto  sa   mga tulisan. Si PO1 Caputolan miingon nga human   madawat  ang  bag  dali  kaayong  mibiya  ang  mga  tulisan sa maong  dapit.  Sa  pagkakaron  padayon  pang  gipanid-an  sa kapolisan  ang  maong  mga  tulisan. (Romeo T. Limpangog/WC) (BANAT NEWS)