DepEd –Talisay gimandoan sa pagpabalik sa gipangtaktak nga permanent teachers
CEBU, Philippines - Gimando sa kagamhanan sa Talisay sa Department of Education (DepEd) Talisay City Division sa pagpabalik sa mga magtutudlo nga duna nay item apan gi-pullout gikan sa ilang mga tunghaan nga gitudloan na unta.
Si Talisay City legal officer Alfredo Sipalay mipadala og demand letter kang DepEd Superintendent Woodrow Denuyo niadtong Hulyo 9, 2013.
Kahinumduman nga sobra sa 20 ka mga magtutudlo ang mibisita sa buhatan ni Mayor Johnny De los Reyes ug nangayo og panabang sa mao nilang problema. Ang mga magtutudlo giingong gipulihan kini og mga Teacher Aid Volunteer (TAV), gawas nga dunay gi-pullout sa ilang mga station dunay mga kwalipikadong magtutudlo ang wala mahatagi og mga item.
Si Delos Reyes mimando kang Sipalay nga atimanon ang problema sa nahisgutang mga magtutudlo.
Base sa demand letter giingong ang kanhi Talisay City Administrator nanawat og mga TAV niadtong buwan sa Hunyo, 2013 dihang ang administrasyon ni kanhi mayor ug karon city councilor Socrates Fernandez paingon nang mapupos.
Nunot niini si Sipalay nagkanayon nga ang maong mga TAV maoy gipuli sa pagpatudlo sa mga permanent teacher o dunay item.
Si Sipalay mimando kang Denuyo sa pag-pullout sa mga TAV nga gipuli sa mga permanent teacher tungod kay giingong ang nahisgutang mga TAV mga midnight appointees kini.
Gawas usab niini ang pagtudlo sa mga TAV nakalapas sa election ban kabahin sa pagpanawat og mga personnel sa gobiyerno ug nakaapekto kini sa interest sa siyudad tungod kay ang kagamhanan sa siyudad maoy magbayad sa mga sweldohan sa TAV.
Sa laing bahin, kagahapon (Huwebes) sa alas 4:00 sa hapon si Denuyo ug Sipalay lakip sa representante sa mga magtutudlo gikatakdang mag-atubang diha sa buhatan sa city legal officer.
Sa laing bahin usab, ang mga magtutudlo kinsa nagpakita sa ilang kasagmuyo mibahad nga mopasaka gyud sila og kasong sibil batok kang Denuyo tungod kay nawagtangan sila og mga trabaho. Ang maong mga magtutudlo nangangkon nga kasagaran kanila maoy gisaligan sa ilang mga pamilya. (/EIM) (BANAT NEWS)
- Latest
