Doktor sa Tuburan imbestigahon bahin sa kamatayon sa bata

CEBU, Philippines - Giparelibohan na ang doktor sa Tuburan District Hospital kinsa giingong wala moatiman sa pasyente nga bata nga hapit nalumos ug nakabsan gyud sa iyang kinabuhi. Kini samtang kagahapon, gilubong na ang batang si Chris John Ledris, ang 3-anyos nga batang gipasangil sa mga inahan nga wala atimana sa mga doktor sa maong tambalanan human kini gidala tungod sa pagkalumos sa dagat.

Si Gob. Hilario Davide III mimando sa kasamtangang hepe sa Integrated Provincial Health Office nga si Dr. Cynthia Genesolango sa pagparelibo una sa mga doktor sa maong tambalanan samtang adunay gihimong imbestigasyon sa maong kaso.

Base sa pagpakighinabi ni Davide sa tagtungod sa biktima, iyang nasayran nga may pagpabaya gyud ang doktor ug mga nars sa tambalanan kinsa ulahi na nga niatiman sa pasyente.

“Bisan kinsa tingale nga pasyente, kinsay ginikanan, maglagot uy,” matud pang Davide.

Si Ledris gidala sa maong tambalanan alas-12 sa udto niadtong Domingo apan ang nars nga si Chito Jaluag giingong nipahibawo sa pamilya nga natulog pa ang doktor nga si Dr. Jatuporn Vatanagul hangtud pasado alas tres na sa hapon.

Nagpaabot ang pamilya nga maatiman ang bata nga abtik pa unta sa ilang pagdala sa tambalanan apan nakabsan gyud sa kinabuhi alas 4 sa hapon sa maong adlaw.

Matud pa ni Davide nga kung naatiman pa unta dayun, hayan ang bata matabang pa. Nunot niini, buot si Davide nga iapil sa imbestigasyon ang mga nars nga diha sa tambalanan.

Ang pamilya sa biktima niduol na usab sa buhatan sa National Bureau of Investigation (NBI)-7 aron magpatabang.

Buot pasakaan og kaso sa pamilya ang hepe sa Tuburan District Hospital nga si Dr. Esteban Ligaray, si Vatanagul ug Jaluag.

Si Ligaray sa sayo pa namahayag nga walay pagpabaya nga nahimo sa iyang mga sakop sanglit ila gihimo ang tanan nga maatiman ang pasyente. Kagahapon, wala mamisahe sa pari ang bata atol sa paglubong tungod kay walay kura paroko nianang tungora ug giingong wala usab maeskedyul ang paglubong niini.

Si Ledris gihatud sa iyang mga classmates sa day care center diin siya nagtungha uban sa ilang mga kahigalaan ug mga kabanay sa usa ka pangpublikong sam-ang sa barangay Putat sa nahisgutang lungsod. (BANAT NEWS)