Namuhi og hayop gidid-an pagtugway niini sa publikong lugar

CEBU, Philippines - Mga tag-iya og kahayopan gibauran sa mga opisyal sa Cebu City Hall nga dili itugway sa mga publiko nga dapit ang ilang mga binuhi aron dili kini dakpon ug sila makabayad og multa.

Matud ni Cebu City Veterinarian Alice Utlang nga sa matag hayop nga madakpan ang mga tag-iya pabayron og tag P500 sa dili pa ibalik kanila ang ilang mga binuhi.

Si Utlang miingon nga sugod buwan sa Hunyo paspasan na nila ang pagpanakop sa kahayopan sama sa manok, baboy, baka, kanding ug uban pa nga anha itugway sa mga plaza, daplin sa karsada ug center islands.

Nabantayan sa mga sakop ni Utlang nga usahay ang center-island sa Imus Road nga sakop sa Barangay Lorega-San Miguel tugwayan og mga manok-igtatari.

Matud ni Utlang nga aduna nay mga hiniktang manok-igtatari nga nadakpan sa iyang mga sakop nga gitugway sa Senior Citizens Park samtang usa ka baka nasakpan nga gibutang sa public place didto sa Barangay Banilad.

Giawhag ni Utlang ang katawhan nga unta mopahibalo dayon kaniya ug sa iyang mga sakop kun makakita sila og mga hayop nga gitugway sa mga publiko nga lugar.

Si Utlang miingon nga ang mga tag-iya sa mga hayop nga ilang nasakpan mibayad dayon sa multa sa ilang nahimo nga kalapasan.  (BANAT NEWS)